Нов бран поскапувања пред зимата: Од понеделник лебот, јајцата, цигарите и пивото со повисоки цени
15/11/2026 13:42
Нов бран поскапувања се најавува пред почетокот на зимата, а според информации на 24инфо.мк, од следната недела еден од поголемите производители на леб ќе ги зголеми цените на дел од своите производи.
Според информациите на порталот, набавните цени на дел од лебовите ќе бидат повисоки за два до четири денари.
Засега нема информација дали и останатите производители ќе го следат истиот пример.
Поскапуваат и јајцата
Најавено е и зголемување на цените на јајцата.
Според 24инфо.мк, поскапувањето може да изнесува околу пет до седум денари, во зависност од производителот и бројот на јајца во пакувањето.
Повисоки цени и кај цигарите и пивото
Во изминатите денови поскапеле и дел од цигарите.
Кај одредени марки зголемувањето изнесува околу 10 денари за кутија.
Повисоки цени се забележуваат и кај пивото, каде лименките и стаклените пакувања поскапеле за околу три до пет денари, зависно од продажното место.
Инфлацијата во октомври 3,3 проценти
Новиот бран поскапувања доаѓа во период кога официјалните податоци повторно покажуваат раст на трошоците за живот.
Според Државниот завод за статистика, инфлацијата во октомври 2026 година изнесувала 3,3 проценти на годишно ниво. Во споредба со септември, трошоците за живот пораснале за 0,4 проценти.
Само кај храната и безалкохолните пијалаци, месечниот раст во октомври изнесувал 0,7 проценти.
Зимата носи дополнителен притисок врз домашните буџети
Поскапувањата доаѓаат во период кога домаќинствата традиционално имаат и повисоки трошоци за греење и електрична енергија.
Доколку се реализираат и најавените корекции на цените на енергенсите, притисокот врз семејните буџети дополнително ќе се зголеми.
Засега останува неизвесно дали новиот бран поскапувања ќе се прошири и на други основни производи, како месото, млекото и млечните производи.






