MKinformer

your daily dose of news

Арифи пред суд за 182 договори: Обвинението тврди штета од 9,3 милиони денари, таа вели дека е невина

17/11/2026 18:59

Судењето на Теута Арифи продолжи денеска во Основниот суд во Тетово, каде што поранешната градоначалничка се товари за злоупотреба на службената положба и овластување при склучување договори со 182 лица. Според обвинителниот предлог, на општинскиот буџет му била нанесена штета од 9.375.200 денари, односно околу 152.000 евра.

Обвинението се однесува на периодот од 1 јануари до 31 декември 2021 година. Според Обвинителството, Арифи како тогашна градоначалничка склучувала договори за повремени и привремени работи со лица кои не биле вклучени во организираниот процес на работа во Општината.

Ревизорите сведочеа за договорите

На денешното рочиште беа сослушани лица кои биле ангажирани со договори, како и внатрешни ревизори на Општина Тетово.

Според изнесеното на судењето, од вкупно 546 договори за дело, за 268 биле доставени извештаи за сработеното, додека за останатите немало таква документација.

Раководителот на единицата за внатрешна ревизија, Бесим Шаќири, сведочел дека при ревизијата не била пронајдена документација за евиденција на присуството на работа на лицата ангажирани со договори.

На рочиштето било посочено и дека дел од ангажираните лица извршувале работи различни од оние наведени во нивните договори.

Арифи: Работев чесно и транспарентно

По завршувањето на рочиштето, Арифи ги отфрли обвинувањата и оцени дека постапката има политичка заднина.

Таа посочи дека постапката била отворена по пријава од актуелното раководство на Општина Тетово и изрази очекување дека во судскиот процес ќе ја докаже својата невиност.

„Очекувам преку овој процес уште еднаш да се докаже дека секогаш сум работела чесно, отворено и транспарентно“, изјави Арифи.

Таа додаде дека не може да ги спречи оние кои, според неа, сакаат случајот да го користат за политички поени.

Следното рочиште на 1 декември

Следното рочиште е закажано за 1 декември, кога треба да продолжи изведувањето на доказите во постапката.

Судењето на Теута Арифи продолжува, а судот треба да утврди дали при склучувањето на спорните договори биле пречекорени службените овластувања и дали е предизвикана штета на буџетот на Општина Тетово.

error: Содржината е заштитена од копирање !!