Денеска сведочи Љупчо Палевски – можно префрлање на вината кон Велибор Манев

Денеска во Основниот кривичен суд Скопје, првообвинетиот за двојното убиство на Вања Ѓорчевска и Панче Жежовски, Љупчо Палевски, ќе даде своја одбрана. Тој е последниот од обвинетите кој ќе одговара на прашања од својот адвокат Јовица Страшевски, обвинителката Жаклина Јосифовска Крстевска, обвинетите-сопартијци од „Десна“ и судијата Ивица Стефановски.

Според досегашните изнесени докази, обвинителството ја засили позицијата преку видео снимка од системот „Безбеден Град“, на која Палевски управува со возило „рено канго“, сопственост на партијата, на денот на исчезнувањето на Вања. На совозачкото место, според тврдењата на обвинителката, бил Велибор Манев.

Додатен клучен доказ е снимката од сигурносните камери во домот на Манев, на која обвинетите ноќта пред грабнувањето се договараат и тестираат мотороли за комуникација. Палевски ги негираше овие снимки, тврдејќи дека се од постар настан поврзан со наводна потрага по злато во Демир Капија.

Манев, кој веќе сведочеше, призна дека тие ја испланирале и извршиле киднапацијата, но изјави дека Палевски без предупредување ги ликвидирал жртвите, додавајќи дека Вања била „грешка“, оти наместо неа требало да се киднапира друго лице – ќерка на фармацевт или градежен инвеститор.

Признанието на Влатко Кешишев, кој Палевски го нарекувал „царот“ во мобилниот телефон, фрли дополнителна сенка врз неговиот мотив. Кешишев сведочеше дека неколку дена пред убиствата, Палевски набавил нови лопати и дурија, и дупката за телото на Вања била ископана однапред.

Интересна пресвртница е појавата на Гоце Трајковски, син на познатата бизнисменка Кираца Трајковска, кој вчера даде интервју во емисијата „Во Центар“, иако беше под истрага и во бегство за палење кафе-бар во Кисела Вода. Трајковски тврдеше дека инспекторите Каришиќ и Димовски го распрашувале за Палевски уште на 29 ноември 2023, пред Палевски да избега. Иако неговата поврзаност со истрагата е нејасна, тој тврди дека преку контакти во „Безбеден Град“ и бензинска пумпа во Велес, успеал да ги поврзе Палевски и Панче со киднапирањето.

На последното рочиште во петокот, Палевски постави директно прашање до таткото на Вања – Александар Ѓорчевски, сугерирајќи дека Трајковски ги дојавувал нивните разговори на инспекторите и дури го сликал Ѓорчевски како спие во салонот, испраќајќи го тоа до Каришиќ.

На тоа, Ѓорчевски кусо одговори:
– Немам коментар.

Палевски реплицираше дека не сака да го вознемирува човекот кој, според него, е „неправедно обвинет“.

Очекувањата за денешното сведочење се големи, бидејќи може да дојде до драматичен обид Палевски вината да ја префрли кон Велибор Манев, кој досега остави впечаток на смирен и доследен сведок.

Останува да видиме дали Палевски ќе остане доследен на својата одбрана или ќе изнесе нови, шокантни детали.