Априлско будење на биткоинот и етерот: Пазарите се стабилизираат, криптовалутите растат
24/04/2025 9:06
Финансиските пазари се стабилизираат по новите пораки од Вашингтон, додека биткоинот и етерот доживуваат значителен раст.
Позитивните сигнали од американскиот министер за финансии, кој изјави дека се очекува наскоро да се нормализираат трговските односи со Кина, донесоа олеснување на пазарите. Индексот Dow Jones порасна за над 1000 поени, а криптовалутите повторно добија на вредност.
Биткоинот, кој пред две недели се тргуваше нешто над 76.000 долари, сега веќе проби над 90.000 долари, што претставува раст од околу 20 проценти. Ваквиот подем се должи на зголемениот прилив на капитал во американските биткоин ЕТФ-фондови – само во понеделникот беа инвестирани над 381 милион долари.
Иако на денот на инаугурацијата на Доналд Трамп биткоинот достигна рекорд од 107.000 долари, подоцна се соочи со значителна корекција. Сепак, април носи нова надеж за крипто-пазарите, особено што биткоинот, за разлика од претходно, повеќе не го следи Nasdaq – додека технолошкиот индекс падна за речиси 6 проценти овој месец, биткоинот порасна за 10 проценти.
Втората најголема криптовалута, етерот, исто така бележи закрепнување. Вредноста на етерот се зголеми за 10 отсто и сега изнесува околу 1.700 долари. Сепак, тоа е далеку од неговото ниво пред една година, кога се тргуваше по речиси двојно повисока цена.
Финансиската нестабилност во САД дополнително се влошува поради политичките тензии, вклучувајќи ги нападите на поранешниот претседател Трамп врз гувернерот на Федералните резерви, Џером Пауел. Доларот, пак, годинава загуби околу 10% од својата вредност, а златото повторно станува популарно безбедно засолниште, достигнувајќи вредност блиска до 3.500 долари по унца.
Според анкетата на Bank of America, дури 61% од професионалните инвеститори очекуваат дека доларот дополнително ќе ослаби во следните 12 месеци – највисоко ниво на песимизам во изминативе две децении.
