Трамп ја номинира Кристи Мекормик за амбасадор во Македонија: Лице без кариера во дипломатија, до јули била федерален комесар за избори

Кристи Мекормик е номинирана за нов вонреден и ополномоштен амбасадор на Соединетите Американски Држави во Македонија. Белата куќа на 9 ноември официјално ја испрати нејзината номинација до Сенатот, кој треба да ја потврди пред таа да ја преземе функцијата.

Мекормик не е кариерен дипломат. Таа повеќе од една деценија беше член на американската Комисија за помош при избори – независна федерална агенција која им помага на сојузните држави во организирањето и техничката поддршка на изборите.

Републикански член на федералната изборна комисија

Мекормик беше номинирана во 2014 година од тогашниот претседател Барак Обама, по препорака на републиканскиот лидер во Сенатот Мич Меконел.

Во Комисијата беше републикански член, а во различни периоди ја извршуваше и функцијата претседател и потпретседател.

Во јули годинава таа ја напушти Комисијата, во период кога администрацијата на Трамп ги отстрани преостанатите демократски членови. Според извештај на Конгресната истражувачка служба и повеќе американски медиуми, Мекормик добила можност да поднесе оставка.

Со тоа Комисијата остана без членови и без кворум за носење одлуки.

Предизвика реакции со изјави за демократите и изборите

Мекормик минатата година се најде во центарот на политичка полемика по настап на панел на „America First Policy Institute“, организација блиска до Доналд Трамп.

Таа тогаш тврдеше дека демократите се противат на построги изборни правила затоа што им биле потребни гласовите на лица кои незаконски престојуваат во САД.

Нејзиното тврдење беше оспорено како неосновано од повеќе американски изборни експерти и организации. Четворица демократски сенатори подоцна побараа таа да ги повлече изјавите или да поднесе оставка.

Во април годинава Мекормик изјави дека нејзините настапи се предмет на истрага.

Има искуство во американската амбасада во Багдад

Иако не е кариерен дипломат, Мекормик има претходно меѓународно искуство.

Од 2009 до 2010 година работела како виш правен советник и вршител на должност заменик-координатор за владеење на правото во американската амбасада во Багдад.

Таму била ангажирана како експерт за избори и учествувала во надзорот на ирачките национални избори, вклучително и во процесот на пребројување на гласовите.

Пред да стане член на изборната комисија, работела и како адвокат во Одделот за граѓански права при американското Министерство за правда, каде што се занимавала со спроведување на федералните изборни закони.

Номинацијата допрва треба да помине во Сенатот

Белата куќа ја вклучи Мекормик во поголем пакет номинации испратени до Сенатот на 9 ноември.

Тоа значи дека Кристи Мекормик во моментов е кандидат за амбасадор, а не официјално назначен американски амбасадор во Македонија.

За да ја преземе функцијата, потребна е потврда од американскиот Сенат.