Путин подготвува барања за НАТО пред преговорите во Абу Даби: Пет европски земји во фокусот на барањата

Русија би можела да ги искористи преговорите во Абу Даби за да побара пошироки отстапки поврзани со безбедносната архитектура на Европа и присуството на НАТО во источниот дел од континентот.

Според „Телеграф“, кој се повикува на дипломатски извори, Москва би можела да инсистира во евентуалниот мировен договор да бидат опфатени и прашања поврзани со проширувањето и военото присуство на НАТО. Како една од можните руски позиции се наведува барање алијансата да го намали своето присуство на нивото од 1997 година.

Што би значело враќање на ниво од 1997 година?

Според дипломатските извори цитирани од британскиот весник, таквото барање потенцијално би значело повлекување на дел од силите на НАТО од земји како Полска, Естонија, Латвија, Литванија и Финска.

Сепак, засега нема официјална потврда од Кремљ дека токму вакво барање формално ќе биде ставено на маса во Абу Даби. Станува збор за проценка на дипломатски извори за можната руска преговарачка позиција.

Русија и пред инвазијата врз Украина во 2022 година бараше НАТО да го намали распоредувањето на војници и вооружување во Централна и Источна Европа. Асошиејтед прес оценува дека слични барања најверојатно повторно ќе бидат дел од руската позиција во разговорите за поширок мировен договор.

Кремљ ја сака Европа во пошироките разговори, но не и во Абу Даби

Иако Москва зборува за потребата Европа во одредена фаза да биде вклучена во разговорите за идната безбедносна архитектура, Кремљ не сака европски претставници директно да учествуваат на претстојната трилатерална средба во Абу Даби.

Советникот на Путин, Јуриј Ушаков, изјави дека европски претставници нема да бидат поканети на оваа рунда преговори.

Портпаролот Дмитриј Песков, пак, посочи дека европското учество ќе стане неопходно подоцна, доколку разговорите навистина навлезат во прашањето за идниот безбедносен поредок на континентот.

Киев бара делумно примирје

Украина на разговорите сака да отвори неколку поконкретни теми.

Претседателот Володимир Зеленски најави дека Киев ќе инсистира на прекин на нападите врз енергетската и критичната инфраструктура, прашања поврзани со Црното Море и извозот, размена на заробеници и подготовка на евентуална лидерска средба.

За Украина, ваквите мерки треба да покажат дали Москва навистина е подготвена за деескалација пред да се премине кон пошироки политички договори.

Безбедносните гаранции главна тема

Преговорите меѓу САД, Русија и Украина се закажани за 10 и 11 ноември во Абу Даби и ќе бидат првата ваква трилатерална средба од февруари.

Како една од главните теми се најавуваат безбедносните гаранции и за Украина и за Русија. Киев бара гаранции слични на принципот од член 5 на НАТО, додека Москва бара идниот договор да ги земе предвид и нејзините безбедносни барања.

Први директни контакти со Путин

Во пресрет на разговорите, финскиот претседател Александар Стаб и норвешкиот премиер Јонас Гар Сторе разговараа телефонски со Владимир Путин.

Разговорот бил инициран од финската и норвешката страна, во консултација со Украина, а теми биле војната, можностите за деескалација и претстојните разговори во Абу Даби. Двајцата лидери нагласиле дека не зборуваат во име на Европа како целина.

Во пресрет на преговорите во Абу Даби, станува сè појасно дека разговорите нема да се сведат само на Украина, туку може да го отворат и многу поширокото прашање за односите меѓу Русија, НАТО и европската безбедносна архитектура.