Од денеска нови правила за плаќање: Сметките добиваат „MK07“, старите уплатници се заменуваат
09/11/2026 10:44
Нови правила за плаќање почнуваат да важат од денеска, 9 ноември, во домашниот денарски платен промет. Најголемите промени се однесуваат на прикажувањето на сметките во IBAN-формат, новите платни налози и новите ознаки за целта на плаќањето.
Најважно за граѓаните е дека постојниот број на сметката не се менува и нема потреба од отворање нова сметка или префрлање на средствата.
Пред сметката се додава „MK07“
Отсега денарските платежни сметки ќе се користат во IBAN-формат.
Тоа значи дека пред постојниот број на сметката ќе се додава ознаката MK07. Приспособувањата во електронското и мобилното банкарство ги прават самите банки.
Клиентите треба да ги следат практичните упатства на својата банка, особено при рачно внесување сметки и подготвување нови налози.
Старите ПП10, ПП30, ПП40, ПП50 и ПП53 се заменуваат
Од денеска почнува примената и на новите стандардизирани платни налози.
Тие ги заменуваат досегашните обрасци ПП10, ПП30, ПП40, ПП50 и ПП53, а ќе се користат и во хартиена и во електронска форма.
Со новите обрасци се менуваат распоредот и структурата на податоците што се внесуваат при плаќањето.
Нови четиризнаковни ознаки за плаќањата
Промена има и кај ознаките за целта на плаќањето.
Досегашните нумерички шифри се заменуваат со четиризнаковни ознаки, со цел попрецизно означување на трансакциите и подобра автоматска обработка на податоците.
Затоа граѓаните и компаниите што претходно подготвиле налози за извршување по 9 ноември треба да проверат дали е внесена соодветната нова ознака.
Компаниите треба да ги проверат сметководствените системи
Посебно внимание треба да обрнат фирмите што автоматски испраќаат платни налози или користат сметководствени и други интегрирани системи.
Кај нив може да бидат потребни дополнителни технички приспособувања, за што банките треба да ги информираат своите клиенти.
Македонската банкарска асоцијација наведува дека промените се дел од модернизацијата и стандардизацијата на националниот платен промет и треба да овозможат поефикасна обработка на платежните трансакции.
Со денешното стартување на новите правила за плаќање, граѓаните не треба да менуваат сметки, но треба да обрнат внимание на новиот IBAN-приказ, новите налози и ознаките за плаќање.
Нови правила за плаќање почнуваат да важат од денеска, 9 ноември, во домашниот денарски платен промет. Најголемите промени се однесуваат на прикажувањето на сметките во IBAN-формат, новите платни налози и новите ознаки за целта на плаќањето.
