Ози Озборн, легендарниот фронтмен на „Блек Сабат“ и симбол на хеви металот, почина на 76-годишна возраст, само неколку недели по неговото проштално појавување во Бирмингем. Во 2020 година тој објави дека боледува од Паркинсонова болест, откако доживеал пад.
„Со неизмерна тага ја споделуваме веста дека нашиот сакан Ози почина утрово, опкружен со своето семејство и љубов. Ве молиме за почитување на нашата приватност во овој тежок момент“, соопшти неговото семејство.
Озборн, препознатлив по својата темна естетика, моќен глас и скандалозен имиџ, предизвикуваше бројни реакции – од осуди од родителски групи до митски статус меѓу љубителите на метал. Познат е и по инцидентот кога во живо на сцена одгриза глава од лилјак. Во контраст на неговата сцена-личност, подоцна беше прикажан како нежен и збунет татко во реалното шоу „Озборнови“.
Дебитантскиот албум на „Блек Сабат“ од 1969 година, кој го носи истото име, се смета за почеток на хеви металот – темен, тежок и моќен звук што ја симболизира промената од хипи-ерата во нешто подлабоко и понестабилно. Албумот „Параноид“, кој следуваше, ги донесе хитовите „War Pigs“, „Iron Man“ и „Fairies Wear Boots“, а песната „Paranoid“ стана заштитен знак на бендот, иако постигна скромен успех на топ-листите.
Според списанието Rolling Stone, „Блек Сабат“ се сметаат за „Битлси на хеви металот“, а влијанието што го оставиле е директно поврзано со цели генерации на метал бендови.
На 6 јули оваа година, Озборн и „Сабат“ се збогуваа со фановите на спектакуларен десетчасовен концерт во Бирмингем, опишан како „металски Лајв ејд“. Се одржа на стадионот „Вила Парк“ пред 40.000 присутни и милиони преку стриминг. Поради здравствени проблеми, Озборн настапуваше седејќи, но ја пренесе својата страст до крај, изведувајќи пет соло песни пред да се приклучи на оригиналната постава на „Сабат“, за првпат по две децении.
„Прекрасно е повторно да се биде на сцена. Ви благодарам од сè срце“, беа неговите последни зборови пред публиката.
Ози Озборн, легендарниот фронтмен на „Блек Сабат“ и симбол на хеви металот, почина на 76-годишна возраст, само неколку недели по неговото проштално појавување во Бирмингем. Во 2020 година тој објави дека боледува од Паркинсонова болест, откако доживеал пад.
