Повторно актуелно прашањето за разрешување на државниот обвинител Љупчо Коцевски

28/07/2025 19:14

Утрешната собраниска седница ќе ја отвори дилемата дали повторно се отвора патот за разрешување на државниот обвинител Љупчо Коцевски. На дневен ред како прва точка е поставена интерпелацијата за неговата работа, поднесена од партијата Левица.

Премиерот и претседател на ВМРО-ДПМНЕ, Христијан Мицкоски, денеска не откри како ќе гласаат пратениците од неговата партија, но порача:

„Јавноста ќе види утре, но ние како политичка партија и јас како човек не ги менувам ставовите преку ноќ,“ – изјави Мицкоски.

Претходна постапка и пауза по трагедијата во Кочани

Постапка за разрешување на Коцевски беше иницирана уште во февруари годинава, со образложение дека:

неовластено изнесувал информации за судски предмети,
ја повредил тајноста на постапките,
непрофесионално го водел Јавното обвинителство,
направил сериозни професионални грешки кои го нарушиле угледот на институцијата.

Сепак, по пожарот во дискотеката „Пулс“ во Кочани, Владата ја стопираше постапката. Тогаш Мицкоски изјави дека му дава „втора шанса“ на обвинителството:

„Ќе почекаме да видиме дали Обвинителството има амбиција да ги преразгледа случаите од минатото и дали правдата ќе биде навистина праведна, а не селективна,“ рече премиерот.

Интерпелацијата и одговорот на Коцевски

Интерпелацијата наведува:

селективни истраги за трагедијата во Кочани,
логистички влијанија врз работата на обвинителството,
хаос во функционирањето на Вишото јавно обвинителство – Скопје.

Во својот одговор, Коцевски ги негираше обвинувањата, истакнувајќи дека истрагата за Кочани се водела врз основа на докази и дека нема политички влијанија. Тој додаде дека интерпелацијата е недозволена според Законот за јавно обвинителство.