Од 111 граѓани кои го поминаа лекарскиот скрининг по пожарот во Трубарево, 11 пратени на дополнителни испитувања
25/09/2025 9:16
Вкупно 111 граѓани поминале низ лекарските скрининг процедури поради загадувањето од големиот пожар во Трубарево. Од нив, 11 лица ќе продолжат со дополнителни прегледи на Клиниката за пулмологија, додека кај останатите не биле утврдени здравствени проблеми кои бараат понатамошен третман, изјави министерот за здравство Азир Алиу.
Според министерот, на дополнителни испитувања се упатени главно повозрасни граѓани. Тој апелираше сите кои чувствуваат кашлица, главоболка, отежнато дишење или други симптоми веднаш да се пријават на скрининг.
„Скринингот продолжува и утре од 10 до 16 часот, а доколку е потребно ќе трае и подолго, за да ги опфатиме сите кои сметаат дека треба да се прегледаат. Подобро е здравствените проблеми да се откријат навреме, за да можат навремено да се третираат“, истакна Алиу.
Според протоколот, скринингот ќе се повтори уште два пати – по три и по шест месеци, со цел да се следат можните последици врз здравјето на граѓаните предизвикани од загадувањето.
