Во Косово денеска се одржуваат локални избори за градоначалници и советници во 38 општини, а сите избирачки места на северот беа отворени точно во 7 часот.
Право на глас имаат 2.069.098 гласачи, а гласањето ќе трае до 19 часот.
На гласачките места ќе бидат издадени две гласачки ливчиња: едно жолто, кое е за избор на градоначалник, и другото сино, кое ќе ги содржи имињата на политичките субјекти што учествуваат на изборите за општински собранија.
За градоначалници има 206 кандидати, од кои 20 се жени, а за општински советници се кандидираа 5.420 кандидати.
И во српските општини на Северот на Косово, изборниот процес започна непречено.
На изборите за општинско собрание, српските партии имаат кандидати за советници во десет општини со мнозинство српско население и девет општини со мнозинство албанско население. Учествуваат вкупно 12 српски партии и иницијативи.
На овие избори на гласачкото ливче има вкупно 93 политички субјекти – 32 партии, две коалиции, 32 граѓански иницијативи и 27 независни кандидати.
