Денес се празнува Света Петка-заштитничка на жените, болните, сиромашните

27/10/2025 10:28

Света Петка, позната и како Преподобна Параскева, е една од најпочитуваните светици меѓу православните христијани, но и меѓу припадниците на други вери. Нејзиното име и лик се симбол на милосрдие, скромност и вера, а народот ѝ се обраќа за заштита, исцеление и духовен мир.

Дар за исцелување и пророштво

Според преданијата, Света Петка имала дар на исцелување и пророштво, па нејзината слава се проширила меѓу народот уште за време на нејзиниот живот. Таа е заштитничка на жените, болните и сиромашните, а нејзините верници и денес веруваат дека преку молитва можат да добијат помош, исцелување и духовна сила.

Народни верувања и обичаи

На денот на Света Петка (27 октомври), верниците не треба да работат домашни работи — не се месе, не се готви, не се шие, не се пере — за да не се навлече гневот на светицата. Овој ден се посветува на молитва, мир и почит кон светицата.

Жените со здравствени проблеми се мијат со осветена вода или со вода од извор посветен на Света Петка.
Девојките чуваат трошки од славскиот колач за да ја видат својата судбина или идниот сопруг.
Во некои села дел од колачот се дава на добитокот за здравје.
Се бере цвеќе и се украсува домот за хармонија и благосостојба во годината што следи.

Живот и посветеност

Света Петка е родена во 10 век во градот Епиват, близу Цариград. Потекнувала од богато, но побожно семејство. По смртта на родителите, го продала своето наследство и го поделила на сиромашните, а потоа се замонашила.

Живеела аскетски живот во јорданската пустина, во пост и молитва. По четири децении, ѝ се јавил ангел и ѝ рекол да се врати во татковината и да ја шири Христовата вера.