Три сообраќајки со тешко повредени лица во еден ден – повредени млади возачи во Гостивар, Охрид и Кратово
05/11/2025 15:38
На 4 ноември 2025 година во текот на денот се случиле три одделни сообраќајни несреќи на различни локации низ државата, при што три лица се здобиле со тешки телесни повреди, соопшти Министерството за внатрешни работи.
Првиот инцидент бил пријавен во 9 часот во ОВР Гостивар. На регионалниот пат меѓу селото Форино и Гостивар, патничко возило марка „Ауди“ со тетовски регистарски таблички, управувано од 23-годишниот А.Б. од селото Чегране, излетало од коловозот. Возачот бил пренесен во Општата болница во Гостивар, каде што му биле констатирани тешки телесни повреди.
Неколку часа подоцна, околу 12:15 часот, во Кратово се случила слична несреќа. На магистралниот пат кај селото Страцин, на местото викано „Чатал“, возило „Фиат Добло“ со скопски регистарски ознаки, управувано од 34-годишниот Е.С. од Скопје, удрило во заштитна ограда. И овој возач е тешко повреден и пренесен во Општата болница Куманово.
Третата сообраќајка е регистрирана околу 15:45 часот на магистралниот пат Охрид–Кичево, во атарот на селото Оровник, општина Дебрца. Возило „Смарт“ со охридски регистарски таблички, управувано од 30-годишниот А.А. од селото Горенци, излетало надвор од коловозот. Возачот со тешки повреди бил пренесен во Специјалната болница „Св. Еразмо“ во Охрид.
Во сите три случаи, увид извршиле екипи од надлежните полициски оддели – Гостивар, Кратово и Охрид, а причините за несреќите се утврдуваат.
