Владата ја усвои иницијативата за разрешување на јавниот обвинител Љупчо Коцевски

Владата на денешната 134. седница ја усвои иницијативата за разрешување на јавниот обвинител Љупчо Коцевски, информираше портпаролката Марија Митева на вонредна прес-конференција. Процедурата, која беше привремено стопирана поради изборниот период, продолжува согласно законските одредби.

Митева истакна дека причините за оваа иницијатива биле јавно образложувани во повеќе наврати, а владината цел останува јакнење на правната држава и заштита на институционалниот интегритет.

Според член 88 став 1 од Законот за јавно обвинителство, а по добиено мислење од Советот на јавни обвинители, Владата му предлага на Собранието да го разреши Коцевски поради сериозни пропусти кои, како што се наведува, ја нарушиле ефикасноста и функционалноста на институцијата.

Меѓу утврдените повреди се наведуваат:

• неовластено споделување информации и податоци од судски предмети, спротивно на законските одредби за тајност на постапките;

• нарушување на угледот на Јавното обвинителство и на сопствениот професионален углед;

• непостапување согласно Уставот, законите и меѓународните договори;

• предизвикување сериозно нарушување на интегритетот и функционалноста на обвинителството, иако токму јавниот обвинител е одговорен за организацијата и работата на институцијата.

Митева нагласи дека со ваквите постапки Коцевски ја прекршил својата должност за зачувување на угледот на функцијата, како што е пропишано во член 82 од Законот за јавно обвинителство.

На крај, Владата официјално му предлага на Собранието да го разреши Љупчо Коцевски од функцијата јавен обвинител на Република Македонија.

Share on Facebook

Tweet

Follow us

Save