Интер го искористи киксот на Наполи и Милан и се искачи на врвот во Серија А по победа во Џенова

Интер повторно е лидер во Серија А откако славеше со 2-1 на гостувањето кај Џенова и максимално ги искористи киксовите на директните конкуренти Наполи и Милан, кои претходно не успеаја да дојдат до победа. Со овој триумф, „нероаѕурите“ ја прекинаа серијата од пет натпревари без пораз на домашниот тим.

Екипата од Милано влезе мотивирано, свесна дека победата значи враќање на врвот, што беше јасно уште од првите минути со целосна контрола на играта.

Бизек изненади, Лаутаро ја потврди доминацијата

Интер поведе уште во 6. минута, кога дефанзивецот Јан Бизек неочекувано се најде во улога на стрелец. По додавање од Лаутаро Мартинез, Бизек упати удар од работ на казнениот простор, а топката заврши во мрежата на Никола Леали за водство од 1-0.

Пред паузата, во 38. минута, капитенот Лаутаро Мартинез ја круниса одличната игра на Интер. По асистенција од Карлос Аугусто, аргентинскиот напаѓач со силен и прецизен удар со левата нога го зголеми водството на 2-0. Тоа беше уште еден показател за ефикасноста на Интер во првите полувремиња оваа сезона.

Џенова се закани, но Интер издржа

Домашниот тим, предводен од Даниеле Де Роси, успеа да ја врати надежта во 69. минута. Витиња најдобро се снајде по една одбиена топка во шеснаесетникот, го мина Јан Зомер и погоди во празната мрежа за 2-1, што внесе доза на драма во завршницата.

Сепак, и покрај притисокот и поддршката од трибините, Џенова не успеа да создаде сериозна шанса за израмнување. Интер со искусна и мирна игра го задржа водството и ја забележа петтата победа на последните шест гостувања во лигата.

Со овој успех, Интер се искачи на првото место на табелата во Серија А, додека Џенова се најде на 16. позиција, само два бода над зоната за испаѓање.

Share on Facebook

Tweet

Follow us

Save