Ова е човекот кој со голи раце го совлада напаѓачот во Сиднеј, Трамп лично го пофали и поздрави за херојскиот чин
14/12/2025 22:32
Американскиот претседател Доналд Трамп остро го осуди вооружениот напад на плажата Бонди во Сиднеј, нарекувајќи го „страшен“ и „јасен чин на антисемитизам“, при што упати пофалби за граѓанинот кој со лична храброст успеал да совлада еден од напаѓачите и да спречи многу потешки последици.
– Сакам да изразам почит кон Австралија и премиерот. Она што се случи е навистина ужасно. Но, постои и светла точка – еден исклучително храбар човек реагираше во момент кога многумина би се повлекле – изјави Трамп.
Херојот е идентификуван како 43-годишниот Ахмед ал Ахмед, трговец со овошје од предградието Сатерленд и татко на две деца. За време на нападот, тој физички го совладал и разоружал еден од напаѓачите, но при интервенцијата бил тешко ранет, откако бил погоден со два куршума. Неговите блиски информираат дека Ахмед е хоспитализиран и дека го очекува оперативен зафат.
– За нас тој е апсолутен херој. Немал никакво искуство со оружје, но не размислуваше за себе, туку за другите – изјави член на неговото семејство.
Снимките кои кружат на социјалните мрежи прикажуваат како Ахмед, скриен зад паркирано возило, ненадејно истрчува, го напаѓа вооружениот човек одзади и му ја одзема пушката, по што напаѓачот се повлекува.
Израелскиот премиер Бенјамин Нетанјаху нападот го оцени како „ладнокрвно убиство“ и изјави дека во разговор со австралискиот премиер Ентони Албанезе предупредил дека одредени политики придонесуваат за раст на антисемитизмот.
– Антисемитизмот расте додека лидерите молчат. Слабоста мора да биде заменета со конкретна акција – порача Нетанјаху.
По инцидентот, безбедносните мерки беа засилени во повеќе светски метрополи, меѓу кои Берлин, Лондон, Њујорк и Варшава, особено околу настаните поврзани со празникот Ханука. Нападот го осуди и британскиот крал Чарлс Трети, кој го нарече „ужасен антисемитски терористички чин“.
Американскиот претседател Доналд Трамп остро го осуди вооружениот напад на плажата Бонди во Сиднеј, нарекувајќи го „страшен“ и „јасен чин на антисемитизам“, при што упати пофалби за граѓанинот кој со лична храброст успеал да совлада еден од напаѓачите и да спречи многу потешки последици.
