Вонреден инспекциски надзор на ГАК по смртта на новороденчето и новинарските објави во медиумите, оформен предмет во ОЈО
16/12/2025 23:16
Министерот за здравство наложи вонреден инспекциски надзор на Државната клиника за гинекологија и акушерство (ГАК) во Скопје, со цел да се утврди дали во случајот со починатото новороденче имало лекарска грешка.
Одлуката следува по медиумските наводи објавени од „Слободен печат“, според кои, врз основа на интерни документи од самата клиника, началничката на Одделот за интензивна нега пријавила педијатарка од истиот оддел, наведувајќи дека несоодветното лекување довело до компликации од кои бебето починало.
Од Клиниката за гинекологија и акушерство соопштија дека се преземени сите неопходни мерки и постапки за спроведување објективна внатрешна истрага и најавија дека ќе бидат преземени соодветни мерки доколку се утврдат евентуални пропусти во третманот.
Во меѓувреме, од Основното јавно обвинителство во Скопје информираа дека е оформен предмет и дека ќе постапуваат по случајот, со цел целосно расветлување на околностите под кои дошло до смртта на новороденчето.
Јавноста очекува институциите транспарентно и навремено да ги соопштат резултатите од надзорот и истрагата, особено поради сериозноста на наводите и чувствителноста на случајот.
