Навид Акрам обвинет за 59 кривични дела по масакрот на плажата Бонди во Сиднеј

Преживеаниот осомничен за масовното пукање што се случи во неделата на плажата Бонди во Сиднеј, Навид Акрам, е официјално обвинет за вкупно 59 кривични дела, меѓу кои 15 убиства и едно дело за извршување терористички чин, соопшти локалниот суд во австралиската држава Нов Јужен Велс, пренесува Би-би-си.

Според обвинението, Акрам се товари за 15 убиства, обид за убиство преку нанесување тешки телесни повреди на повеќе лица, како и за употреба на огнено оружје со намера за предизвикување сериозна штета. Дополнително, тој е обвинет за јавно истакнување симбол на забранета терористичка организација и за поставување експлозивни направи во или во близина на објекти со намера да предизвика разурнување и човечки жртви.

Во истиот инцидент, вториот напаѓач, неговиот татко, 50-годишниот Саџид Акрам, беше убиен за време на престрелка со полицијата на самото место.

Во нападот, кој се случи за време на јавен настан по повод одбележувањето на првата вечер од Ханука, загинаа 15 лица, додека околу 40 беа повредени. Овој трагичен настан се смета за најсмртоносно масовно пукање во Австралија од 1996 година наваму.

Австралиските медиуми објавија дека таткото и синот еден месец пред нападот престојувале на Филипините, каде што, според сомнежите на истражните органи, посетиле кампови за „воена обука“. Во врска со нивниот престој, филипинската полиција веќе започнала сопствена истрага.

Како што наведува Би-би-си, истрагата укажува дека Саџид и Навид Акрам биле симпатизери на терористичката група „Исламска држава“, а во нивното возило биле пронајдени симболи и знамиња поврзани со таа организација.

Полицијата соопшти дека нападот бил планиран во објект за краткорочно сместување, лоциран на околу 30 минути возење од плажата Бонди, каде што подоцна бил извршен крвавиот напад.

Share on Facebook

Tweet

Follow us

Save