КОЛУМНА на Уредникот на МкИнформер за 2025 Година во која институциите молчеа, а граѓаните платија
31/12/2025 20:32
Оваа колумна не ја пишувам како дистанциран набљудувач, туку како уредник што цела година ја живееше реалноста одблиску, ден по ден, наслов по наслов, видео по видео, трагедија по трагедија.
2025 година нема да остане запаметена по реформи, ниту по суштински напредок. Ќе остане запаметена по упорниот институционален молк, по селективната одговорност и по чувството дека системот реагира само кога е притиснат до ѕид, а тоа е недоволно, доцна и половично.
Најтешкиот и најболниот момент беше трагедијата во Кочани.
Пожарот во дискотеката „Пулс“ не беше изолиран инцидент, ниту несреќен случај. Тој беше симптом. Симптом на држава што со години толерира небезбедни објекти, затвора очи пред очигледни прекршувања и дозволува корупцијата да стане „нормала“. Во тој момент, изговорите престанаа да важат. Граѓаните не бараа револуција. Бараа правда. И тоа не селективна, туку еднаква за сите.
Како уредник, не можев и не сакав да молчам. Затоа пишував. Затоа поставувавме прашања. Затоа инсистиравме на одговори. И затоа ќе продолжиме. Затоа што молкот не е неутрална позиција … тој секогаш оди во прилог на моќните.
Во текот на годината сведочевме и како изборите сè повеќе се претвораат во маркетинг-натпревар, а сè помалку во судир на идеи и одговорност. Слушавме ветувања за локален развој, модерни општини и „нови почетоци“, додека истите улици остануваа небезбедни, истите објекти нелегални, а истите проблеми, нерешени со години.
Гледавме и како правдата станува релативен поим. Некои предмети се решаваат со брзина на светлината, додека други тапкаат во место со години, сè додека јавноста не ги заборави. Тоа не е случајност. Тоа е избор. А секој таков избор директно ја руши довербата во институциите и ја разградува самата идеја за држава.
Но 2025 ни покажа и нешто охрабрувачко: јавноста не е рамнодушна. Луѓето зборуваат, реагираат, не прифаќаат лесни објаснувања и не се задоволуваат со празни фрази. Тоа е сигнал што властите упорно го игнорираат, но не можат да го игнорираат бесконечно.
Мојата уредничка позиција е јасна, принципиелна и лична: Држава без еднаква одговорност и без правичност, не може да бара доверба од своите граѓани.
Новинарството не постои за да биде удобно. Постои за да биде точно, гласно и непријатно, особено кога е најпотребно. Тоа не е избор, туку обврска кон јавноста.
2025 заврши. Но прашањата што ги отвори … НЕ. И додека тие прашања остануваат без одговор, ние нема да престанеме да ги поставуваме.
