Агенција за храна и ветеринарство (АХВ) информира дека од 1 јануари 2026 година нема да постапува по анонимни пријави за инспекциски надзор, согласно член 62 став 3 од новиот Закон за инспекциски надзор, кој стапи во сила на почетокот на годината.
Од Агенцијата појаснуваат дека сите иницијативи за спроведување инспекциски надзор мора да бидат уредно потпишани и да содржат точни податоци за подносителот, како и јасно наведен предмет на надзорот.
„Инспекциските служби на АХВ нема да постапуваат по анонимно поднесени иницијативи. Постапувањето по уредно поднесените иницијативи ќе се реализира согласно Процедурата за постапување по иницијативи за инспекциски надзор“, информираат од АХВ.
Како може да се поднесе иницијатива?
Граѓаните и правните лица можат да поднесат претставка:
преку контакт формата „Поднесете претставка“ на интернет-страницата на АХВ,
електронски на службените е-адреси на Агенцијата,
или лично во подрачните единици на АХВ, на соодветен образец.
Што мора да содржи пријавата?
Иницијативата задолжително треба да содржи:
назив на инспекцијата до која се поднесува,
име, презиме и адреса на подносителот (или назив и седиште на правното лице),
законски застапник или полномошник (доколку има),
краток опис на повредата,
назнака на субјектот кај кој се бара инспекциски надзор.
Доколку иницијативата е нецелосна или нејасна, таа ќе биде вратена до подносителот со рок од седум дена за дополна. Ако во предвидениот рок не се изврши дополнување, ќе се смета дека пријавата е повлечена.
Со оваа одлука, АХВ има за цел да обезбеди поголема правна сигурност и јасна процедура во постапувањето по инспекциски иницијативи, но истовремено се очекува и зголемена одговорност кај подносителите на претставки.
One thought on “АХВ од 2026 не постапува по анонимни пријави”
Comments are closed.