(Фото/Видео) Пет месеци власт, мини депонии меѓу луксузни комплекси
27/02/2026 10:57
Бардовци -симбол на мир и луксузно домување. Барем така изгледа на рекламните брошури.
Во реалноста? Недовршен пат, мини депонии и комунална негрижа.
Населбата, која административно припаѓа на Општина Карпош, последниве години доживува градежен бум. Луксузни вили, модерни комплекси, високи огради и уредени дворови. Но веднаш до нив, градежен шут, стара покуќнина и комунален отпад.
Контраст што боде очи.
Еден од најсериозните проблеми е недовршениот пат кој треба да биде втор влез и излез од Бардовци кон индустриската зона Визбегово и скопската обиколница. Недостасуваат околу стотина метри асфалт, стотина метри што nне се довршуваат и ја делат населбата од целосно функционална сообраќајна поврзаност.
Во меѓувреме, покрај новоизградените луксузни објекти никнуваат мини депонии. Наместо урбан ред, импровизирани депонии. Наместо инспекциски надзор, молк.
Прашањето е едноставно: Како може престижна населба да изгледа како периферија без основна грижа?
Новиот градоначалник на Општина Карпош беше избран во Ноември 2025 година. Но само неколку месеци подоцна, теренот зборува поинаку. Ако Бардовци е приоритетна зона за урбан развој, зошто вториот пристапен пат сè уште е недоизграден? Зошто инспекциските служби не реагираат на дивите депонии? Зошто комуналната хигиена не го следи темпото на градежната експанзија?
Луксузот не се мери само со квадратура и фасада. Се мери со инфраструктура. Со безбедност. Со чиста околина.
Бардовци денес е пример за урбан парадокс, приватен луксуз во јавен неред. Вили од милион евра, а пат што завршува во кал. Елитни комплекси, а ѓубре покрај тротоар.
Развој без систем, прави само привид.
Доколку локалната власт навистина сака Бардовци да биде симбол на модерно живеење, тогаш првиот чекор не е нова градежна дозвола, туку завршување на тие стотина метри асфалт и расчистување на депониите што фрлаат сенка врз целата населба.
Во спротивно, Бардовци ќе остане луксузна фасада со запуштена позадина.
