Кина предупредува на нова глобална криза со чипови
07/03/2026 21:16
Кинеското Министерство за трговија предупреди на можност од нова глобална криза во синџирот на снабдување со полупроводници поради спор меѓу холандскиот производител на чипови „Некспериа“ и неговата кинеска подружница.
Глобалната автомобилска индустрија веќе се соочи со нарушувања во октомври минатата година, кога Кина воведе ограничувања за извоз на чипови произведени од Nexperia. До мерката дојде откако холандските власти ја презедоа контролата врз компанијата од нејзината кинеска матична компанија Wingtech.
Чиповите на оваа компанија се широко користени во автомобилските електронски системи, поради што секое нарушување во производството може да има сериозни последици за автомобилската индустрија.
Иако по дипломатски разговори недостигот на чипови делумно беше ублажен, спорот меѓу холандското седиште на Nexperia и нејзината кинеска единица дополнително се продлабочи.
Холандското раководство ја поддржа одлуката за отстранување на контролата врз Wingtech, додека кинеската подружница бара повторно воспоставување на контролата.
Предупредувањето од Пекинг дојде откако кинеската единица за пакување чипови на компанијата го обвини седиштето во Холандија дека им го блокирало пристапот до службените сметки на вработените во Кина.
Во соопштението објавено на веб-страницата на Министерството за трговија на Кина се наведува дека овој потег предизвикал нови спорови и дополнително ги комплицирал преговорите меѓу двете страни.
Кинеските власти предупредуваат дека холандското седиште на компанијата сериозно го нарушило нормалното работење и производство, додавајќи дека Холандија ќе сноси одговорност доколку спорот повторно доведе до глобални проблеми со снабдувањето со полупроводници.
Од друга страна, седиштето на компанијата во Холандија не негираше дека ги блокирало ИТ системите, но ги отфрли тврдењата дека тоа влијаело на производството во фабриката за склопување и тестирање чипови во кинеската провинција Гуангдонг.
Кинеската подружница на компанијата прогласи независност од матичната компанија во септември, откако контролата врз Wingtech беше отстранета. Оттогаш двете страни меѓусебно се обвинуваат за нефер преговори, додека холандското седиште ги суспендира испораките на полупроводнички плочки до фабриката во Гуангдонг, пренесува „Ројтерс“.
