Иранска ракета погоди улица во центарот на Тел Авив
24/03/2026 10:04
Иранска ракета со боева глава од околу 100 килограми утрово погоди мала улица во центарот на Тел Авив, предизвикувајќи голема материјална штета. Нападот бил дел од шестиот бран ирански удари од полноќ, при што биле оштетени три згради и повеќе возила во околината.
Според првичните информации, ракетата директно удрила во коловозот, а не во станбен објект, што според властите е една од причините поради кои биле избегнати потешки последици.
Автомобилите на местото на ударот биле целосно уништени, а блиските објекти претрпеле сериозни оштетувања. Израелската служба Маген Давид Адом соопшти дека најмалку шест лица се полесно повредени на четири различни локации во градот. Четири лица побарале помош поради благо вдишување чад, но не биле пренесени во болница.
На местото интервенирале противпожарни и спасувачки екипи, кои го изгаснале пожарот, ја пребарале областа и ги исклучиле изворите на електрична енергија. Подоцна било соопштено дека во едно од засолништата биле пронајдени луѓе со кои бил воспоставен контакт.
Од противпожарната служба посочиле дека токму престојот во засолниште помогнал да се избегнат човечки жртви.
Командантот на округот Тел Авив, Хаим Саргароф, изјавил дека станува збор за ракета со боева глава од околу 100 килограми и дека штетата е голема поради директниот удар.
Во истиот ирански бран напади, најмалку два стана биле оштетени и во Рош Хаајин. Локалните власти информирале дека на еден од главните патишта таму била пронајдена неексплодирана направа, по што на терен биле испратени специјализирани полициски и безбедносни екипи.
Нападот дополнително ги зголемува тензиите на Блискиот Исток, каде продолжува размената на удари меѓу Иран и Израел.
