ВЛЕН: Кој го одолговлекува случајот со Артан Груби, архивата на ДУИ?
25/05/2026 10:27
ВЛЕН обвинува дека случајот поврзан со Артан Груби предолго се одолговлекува и бара побрза и поодлучна реакција од институциите.
Од коалицијата велат дека јавноста сè уште чека одговори за предметот во кој, според нивните наводи, Артан Груби и Перпарим Бајрами се сомничат за злоупотреби во вредност од 8 милиони евра во случајот „Државна лотарија“.
Според ВЛЕН, ова не е обичен предмет, туку случај што, како што тврдат, ги отвора врските меѓу политиката, бизнисот и власта од времето на ДУИ.
Во реакцијата, од ВЛЕН јавно прашуваат кој има интерес случајот да се одолговлекува и дали постои страв од можни информации што би можеле да произлезат од него.
Коалицијата во својата изјава го споменува и името на Ислам Абази. Тврдат дека јавноста има право да поставува прашања и за можни релации поврзани со вработувања и институционални трансфери, кои, според нив, дополнително отвораат сомнежи за мрежа на заштита и недопирливост.
Од ВЛЕН нагласуваат дека случајот „Груби“ не смее да заврши во фиока и дека не треба да се претвори во ново поле за политички договори во сенка.
Според нив, секое одолговлекување на правдата директно ја поткопува довербата на граѓаните во институциите и негативно се одразува врз европскиот пат на државата.
Засега нема реакција од посочените лица во однос на овие тврдења.
ВЛЕН обвинува дека случајот поврзан со Артан Груби предолго се одолговлекува и бара побрза и поодлучна реакција од институциите.
