Крај на една ера: На продажба Бристол и Арапска куќа

27/05/2026 8:49

Македонијатурист ги продава хотелите „Бристол“ и „Јадран“ и подготвува нова голема инвестиција во Аеродром

Македонијатурист донесе одлука да продаде дел од своите препознатливи објекти во центарот на Скопје, меѓу кои и хотелите „Бристол“ и „Јадран“ (познат како Арапска куќа). Паралелно, компанијата подготвува нова голема инвестиција во Општина Аеродром вредна 17,7 милиони евра.

Што се продава?

Според одлуката усвоена на седница на Собранието на акционери одржана на 22 мај 2026 година, Македонијатурист ќе ги отуѓи:

Хотел „Бристол“
Хотел „Јадран“ (познат како Арапска куќа)
Дополнителен недвижен имот во централното градско подрачје
Станови на улицата „Максим Горки“
Деловниот објект „Пивница“

Вредноста на имотите ќе биде утврдена со проценка од овластен проценител. Управниот одбор е овластен за склучување на договорите за продажба.

Голема инвестиција во Општина Аеродром

Истовремено со продажбата, компанијата најавува инвестиција во Општина Аеродром, каде планира купување градежна парцела со површина поголема од 8.000 квадратни метри, во вредност од 17,7 милиони евра.

Локацијата е во Реонски центар, каде е предвидена изградба на станбено-деловен комплекс. Од компанијата очекуваат проектот да донесе значителни приходи преку продажба и издавање на деловниот и станбениот простор.