Руски дрон удри во зграда во балканска држава членка на НАТО

Руски дрон удри во станбена зграда во романскиот град Галаци: Две повредени лица, евакуирани 70 жители

Падот на руско беспилотно летало врз станбена зграда во романскиот град Галаци отвори едно од најнепријатните безбедносни прашања за земја членка на НАТО: зошто дронот не бил соборен пред да удри во населено место?

Четири минути и тешка одлука во воздух

Според објаснувањата на романските власти, војската имала само неколку минути за реакција, додека леталото се движело ниско и брзо кон градот, што го направило пресретнувањето речиси невозможно.

Според романските воени објаснувања, времето меѓу детекцијата и ударот било прекратко за целосна идентификација, проценка на ризикот и борбена реакција. Во вакви ситуации, армијата мора да утврди:

• дали објектот претставува непосредна закана?

• каде се движи?

• дали евентуалното соборување може да предизвика уште поголема штета на земја?

Романските власти веднаш кренале два авиона Ф-16 и еден воен хеликоптер, но леталото веќе ја погодило зградата пред да може да биде неутрализирано.

Што се случи во Галаци?

Инцидентот предизвика сериозна загриженост во Романија и во рамките на НАТО, бидејќи дронот не паднал во ненаселено поле или во близина на границата, туку удрил во покрив на станбена зграда.

При експлозијата:

• две лица се повредени (жена и дете)

• околу 70 жители се евакуирани

• причинета е значителна материјална штета на зградата

Руски „Геран-2“ удри во зграда

Стручните тимови од армијата, полицијата и безбедносните служби го истражуваат местото на ударот во Галаци. Според првичните информации, станува збор за руски дрон од типот „Геран-2“ – верзија на иранскиот „Шахед-136“, летало кое Русија масовно го користи во нападите врз украинската инфраструктура.

Дронот носел експлозивно полнење и детонирал при ударот во станбената зграда.

Reuters објави дека романското Министерство за одбрана соопштило оти дронот летал премногу ниско за да биде пресретнат.

Застарена одбрана пред новата ера на камиказа-дронови

Случајот во Галаци повторно ја отвори темата за тоа колку европските армии се подготвени за новиот тип војување, во кој евтини беспилотни летала можат да предизвикаат голема штета.

Дел од копнените системи за противвоздушна одбрана во Европа се развивани за поинакви закани, пред масовната употреба на мали, нисколетачки камиказа-дронови.

Од почетокот на руската инвазија врз Украина, романските власти регистрирале:

• повеќе упади на дронови во националниот воздушен простор

• десетици случаи на пронајдени фрагменти од беспилотни летала на своја територија

Романија бара забрзана испорака на антидрон системи

Токму затоа, Романија побара забрзана испорака на антидронски системи од сојузниците во НАТО.

Инцидентот ја претвори руската војна против Украина во директна закана за цивили на територија на НАТО, а прашањето што остана да виси над Галаци е најтешкото: дали следниот дрон ќе биде откриен навреме и дали Европа има доволно брза одбрана за војна што веќе не застанува на границите?

Ќе побара ли Романија активирање на членот 4 од НАТО?

Членот 4 од НАТО предвидува консултации меѓу сојузниците кога некоја членка смета дека се загрозени нејзината безбедност, територијален интегритет или политичка независност.

Тоа значи дека ако држава како Романија побара активирање на членот 4, сите членки на Северноатлантскиот совет итно седнуваат на разговори за да ја проценат заканата и можните мерки.

Засега романските власти не најавија активирање на членот 4, но притисокот врз НАТО да обезбеди поефикасна заштита на источниот фронт расте.