Неколку метеорски дождови над Македонија

25/07/2026 17:36

Небото над Македонија го очекува спектакл: Доаѓаат Персеидите и уште два метеорски дождови

Љубителите на астрономијата во следните три недели ќе имаат можност да уживаат во неколку метеорски дождови, а највпечатливата небесна појава ќе биде во средината на август, кога Персеидите ќе го достигнат својот максимум.

Покрај Персеидите, кон крајот на јули активни ќе бидат и Јужните Делта Аквариди и Алфа Каприкорнидите.

Првите метеори пристигнуваат на крајот од јули

Првата можност за набљудување ќе биде во ноќите околу 30 и 31 јули, кога се очекува најголемата активност на Јужните Делта Аквариди и Алфа Каприкорнидите.

Според календарот на Меѓународната метеорска организација, Делта Акваридите можат да достигнат до 25 метеори на час, додека Алфа Каприкорнидите се значително послаби, со околу пет метеори на час.

Сепак, набљудувањето ќе биде отежнато поради силната месечева светлина, бидејќи полната Месечина настапува на 29 јули.

Персеидите ќе бидат врвот на спектаклот

Главниот небесен настан се очекува во ноќта меѓу 12 и 13 август, кога Персеидите ќе го достигнат својот максимум.

Најголемата активност се прогнозира меѓу 4 и 6 часот наутро на 13 август, иако метеорите ќе можат да се забележат во текот на целата ноќ.

Во идеални услови, Меѓународната метеорска организација наведува дека може да се видат до 100 метеори на час, иако реалниот број зависи од светлосното загадување, временските услови и видливоста на радијантот.

Одлични услови за набљудување

Годинава условите за следење на Персеидите ќе бидат особено поволни, бидејќи младата Месечина настапува на 12 август, што значи дека нема да има силна месечева светлина која би ја намалила видливоста.

Персеидите настануваат кога Земјата минува низ честичките што ги остава зад себе кометата 109P/Свифт-Татл. При влегувањето во атмосферата, тие согоруваат со голема брзина и создаваат светли траги познати како „ѕвезди што паѓаат“.

Не е потребна специјална опрема

За набљудување на метеорскиот дожд не е потребен телескоп или двоглед. Најдобро е да се избере темна локација надвор од градовите, со непречен поглед кон небото.

Персеидите може да се забележат уште од 22 или 23 часот, но најголем број метеори најчесто се појавуваат по полноќ и непосредно пред изгрејсонце.