По загадувањето на водата во Гостивар се стравува од хепатит А и Е: Над 3.800 граѓани побарале лекарска помош
25/07/2026 8:08
Комисијата за заразни болести предупреди дека во наредниот период во Гостивар постои ризик од појава на хепатит А и хепатит Е, како можна задоцнета последица од загадувањето на водата.
Во моментов нема регистрирани и потврдени случаи на овие заболувања. Сепак, здравствените власти најавуваат засилен епидемиолошки надзор поради периодот на инкубација на вирусите.
Околу 3.850 граѓани побарале лекарска помош
Претседателката на Комисијата за заразни болести, Жаклина Шопова, информирала дека во изминатите десет дена околу 3.850 жители на Гостивар побарале лекарска помош.
Пациентите најчесто се жалеле на дијареа, повраќање и други стомачни тегоби.
Иако бројот на нови пациенти се намалува, здравствените власти предупредуваат дека не смее да има опуштање. По цревните инфекции можно е со задоцнување да се појават и други заболувања поврзани со загадена вода.
Хепатитот може да се појави по неколку недели
Хепатит А најчесто се пренесува преку храна или вода загадена со вирусот. Неговиот период на инкубација вообичаено трае од 14 до 28 дена.
Хепатит Е, исто така, главно се пренесува преку загадена вода. Симптомите може да се појават од две до десет недели по изложувањето на вирусот.
Токму долгиот период на инкубација е причината поради која Комисијата предупредува дека нови случаи може да бидат регистрирани и подоцна.
Засега нема епидемија на жолтица
Од Комисијата нагласуваат дека предупредувањето не значи дека во Гостивар веќе има епидемија на жолтица.
Станува збор за можен здравствен ризик по загадувањето на водата, поради што ќе продолжи следењето на состојбата.
Граѓаните треба да побараат лекарска помош доколку забележат пожолтување на кожата или белките на очите, темна урина, изразен замор, мачнина или болки во стомакот.
Не е утврден единствен причинител на инфекциите
Кај досегашните пациенти сè уште не е утврден еден заеднички причинител на масовните цревни инфекции.
Кај дел од испитаните примероци биле изолирани астровирус и шигела. Сепак, истите причинители не биле пронајдени кај сите заболени.
Комисијата повторно апелира водата од гостиварскиот водовод да не се користи за пиење и други намени сè додека надлежните институции официјално не потврдат дека е безбедна.
Комисијата за заразни болести предупреди дека во наредниот период во Гостивар постои ризик од појава на хепатит А и хепатит Е, како можна задоцнета последица од загадувањето на водата.
