Отровна тишина на Велешкото Езеро, забрана за капење трето лето по ред
Трето лето по ред, Велешкото Езеро е затворено за капење и рекреација. Забраната, што стана редовна летна појава, доаѓа по новите анализи на Институтот за јавно здравје кои покажаа алармантна слика на отровна вода.
Што покажаа анализите
Земени се примероци од Градската плажа и од хотелот Романтик, а резултатите се повеќе од загрижувачки. Во водата се детектирани цијанотоксини и цијанобактерии, како и амонијак. На површината плива желатинозна смеса во зеленкасто-кафеава боја, додека зелени алги формираат цели површини што се движат низ езерото.
„Водата не смее да се користи за капење и рекреација се додека од стручна институција не се докаже отсуство на цијанобактерии, но и цијанотоксини“, стои во Извештајот на ИЈЗ објавен на 21 јули.
Исто како лани и пред две години
Реченицата е иста како онаа од минатото и од претминатото лето. Со секое ново испитување, истата констатација, истата забрана, истото езеро што тоне во тишина наместо да биде полно со гласови на капачи.
Миллионски интервенции, нула резултат
Минатата година Владата издвои 10 милиони денари за итен спас на Велешкото Езеро. Интервенцијата дојде веднаш откако Хидробиолошкиот завод од Охрид во јули 2024 година потврди дека езерото е полно со фекалии. Од тогаш до денес, единствено што следува се забрани.
Хидробиолозите препорачаа итна интервенција со кислород и чистење на желатинозните наслаги. Како една од долгорочните мерки предложена е изградба на дополнителни бушотини за внес на свежа вода, како и ревизија на проектот за поврзување со цевковод од Лисиче до Младост.
Тажна слика на уништен екорезорт
Ако некогаш Велешкото Езеро беше спас од летните горештини, а Градската плажа место за одмор на луѓе од околните градови, денес е тажна слика на последиците од прекумерната урбанизација и бавното умирање на некогаш реткиот екорезорт. Две години подоцна, езерото изгледа идентично како и пред интервенциите, отровно, тивко и затворено.
