Јашаровска за Боки 13: Прашањето не е дали тој е проблемот, туку кој му дава простор и кој го финансира

Авторката и активистка Ана Снежана Јашаровска преку објава на Фејсбук отвори прашање за одговорноста на медиумите и големите компании при изборот на личности на кои им даваат простор и спонзорска поддршка.

Јашаровска, која е претседателка на „Amaro Drom“ и работи со жени жртви на насилство, во својата реакција се осврна на медиумското присуство на Бојан Јовановски – Боки 13.

„За мене прашањето не е дали Боки 13 е проблемот. Прашањето е: кој му дава простор и кој го финансира?“, напиша таа.

„Со спонзорствата се испраќа и порака“

Јашаровска смета дека проблемот е поширок од појавувањето на една конкретна личност во јавноста.

Според неа, големите компании и брендови со изборот кого ќе поддржат не инвестираат само во публика и видливост, туку влијаат и врз вредностите што се промовираат во јавноста.

Таа прашува зошто личности поврзувани со скандали и контроверзии полесно добиваат голем медиумски простор и спонзори.

Според нејзиниот став, на тој начин може да се испрати порака дека сензацијата и контроверзијата се нешто што се наградува.

Културата и образованието тешко доаѓаат до поддршка

Во својата објава Јашаровска прави споредба со авторите, културните работници и активистите.

Таа посочува дека е многу потешко да се обезбедат средства за книга, библиотека, млад автор, поет, културен настан или проект што ги поттикнува децата да читаат.

„Луѓето кои создаваат нешто вредно со години се борат сами, пишуваат проекти, бараат донации и тропаат на десетици врати“, наведува Јашаровска.

Според неа, за ваквите проекти често нема ниту доволно финансиска поддршка, ниту доволно медиумски простор.

„Потоа се прашуваме кои им се идолите на младите“

Јашаровска смета дека изборот на медиумите директно влијае врз тоа кои личности младите ги препознаваат како успешни и вредни за следење.

Таа оценува дека сензационалните содржини најчесто добиваат предност бидејќи носат повеќе кликови, додека компаниите своите средства ги насочуваат таму каде што има најголемо внимание.

На тој начин, според неа, се создава затворен круг во кој позитивните примери остануваат во сенка.

„Не можеме да очекуваме децата да ја сакаат литературата ако ретко гледаат писатели на телевизија. Не можеме да очекуваме да ја ценат културата ако културните настани никој не ги промовира“, порача Јашаровска.

Повеќе простор за позитивни примери, не барам забрани

Јашаровска нагласува дека не се залага за забрана на нечие јавно појавување.

Наместо тоа, бара поголема рамнотежа и повеќе внимание за луѓето кои, според неа, создаваат трајна општествена вредност.

Тука ги вбројува писателите, наставниците, научниците, уметниците, хуманитарците и активистите.

„Сакам да живееме во општество во кое исто толку внимание, а можеби и повеќе, ќе добиваат луѓето што создаваат вистинска вредност“, наведува таа.

Апел до медиумите и спонзорите

На крајот, Јашаровска порача дека медиумите и компаниите треба да бидат свесни за влијанието што го имаат врз младите генерации.

Според неа, тие не продаваат само производ или медиумска содржина, туку помагаат да се создаде претстава за тоа што значи успех.

„Ако продолжиме да ги наградуваме само скандалите, не треба да се чудиме какви идоли ќе имаат идните генерации“, порача Јашаровска.

Таа смета дека поголемата поддршка за културата, образованието, литературата, науката и активизмот би испратила поинаква порака – дека знаењето, трудот и добрите дела сè уште имаат вредност.