Лекар почна штрајк со глад пред Медицинскиот факултет: Тврди дека бил дискриминиран поради возраста

Лекар почна штрајк со глад пред Деканатот на Медицинскиот факултет во Скопје, откако, како што вели, 15 дена не добил одговор од надлежните институции.

Станува збор за д-р Дарко Василевски, лекар и приватен специјализант, кој денеска започна мирен протест.

Тој најави дека ќе остане пред факултетот 24 часа дневно и дека во текот на денот ќе постави и шатор.

„Ова не е насочено кон никого лично“

Василевски преку објава се заблагодари на сите кои му дале поддршка во изминатите денови.

„Ова не беше одлука која ја донесов лесно. Ова не е насочено кон никого лично“, наведе тој.

Причината за протестот е спорот околу последниот оглас за вработување двајца доктори по медицина на неопределено време во Институтот за медицинска и експериментална физиологија со антропологија.

Тврди дека возраста му била пречка

Василевски претходно тврдеше дека возраста била земана предвид при неговите конкурирања за работно место на Медицинскиот факултет.

Според неговото сведоштво, уште во 2022 година од член на комисијата добил порака дека е „стар“ и дека не може академски да напредува.

Тој вели дека и на интервју во 2023 година повторно било отворено прашањето за неговата возраст.

На последниот оглас во 2026 година, според неговите тврдења, член на комисијата директно му рекол: „Ти си 80-то годиште“.

Овие наводи се тврдења на Василевски и не претставуваат утврдени факти.

Вели дека ги исполнувал условите

Василевски тврди дека ги исполнувал условите од последниот оглас.

Дополнително наведува дека бил единствениот кандидат кој ги поминал сите турнуси од специјализацијата по спортска медицина.

Програмата и спроведувањето на таа специјализација се поврзани со институтот каде што биле отворени работните места.

Избрани двајца други кандидати

На 14 септември Медицинскиот факултет го известил Василевски дека за двете работни места се избрани Слободан Доксимовски и Дарко Серафимовски.

Со нив, според известувањето, требало да бидат склучени договори за вработување на неопределено време.

Како што објави „Скопје1“, во доставеното известување не биле наведени критериумите според кои бил извршен изборот.

Лекар почна штрајк со глад и најави дека ќе остане пред Медицинскиот факултет сè додека не добие одговор за случајот.