Врело на Матка испиша светска историја: Нуркач стигна до 338 метри, поставени три рекорди

Рекорд во Врело е поставен за време на меѓународната експедиција во подводната пештера во кањонот Матка, каде што спелеонуркач достигнал длабочина од 338 метри.

Според Спелеонуркачкиот клуб „Врело“, експедицијата поставила три светски рекорди и открила два нови подводни канала.

Рекордното нуркање го извел Полјакот Бартломиеј Питала, а целата операција траела девет часа.

Длабочина од 338 метри

Досегашната истражена длабочина на Врело изнесувала 287 метри.

Со новото нуркање таа е зголемена за уште 51 метар и достигнала вкупно 338 метри.

Од клубот наведуваат дека со тоа Врело ги надминало Фонт Естрамар во Франција, со 312 метри, и Елефанте Бјанко во Италија, со 292 метри.

Според нивните податоци, поставени се рекорди за најдлабоко истражена пештера од човек, најдлабоко нуркање во пештера и длабинско нуркање на отворени води.

Откриени два нови подводни канала

Експедицијата „Врело 2026“ се одвивала од 10 до 17 октомври, со учество на 15 нуркачи од Македонија, Полска и Италија.

За време на истражувањето биле откриени и два досега непознати подводни канала.

Првиот бил пронајден на околу 300 метри од влезот, на длабочина од 33 метри.

Каналот е долг приближно 100 метри и се поврзува со дел од пештерата истражен во 2000 година.

Вториот канал бил откриен на длабочина од 170 метри.

Тој е долг околу 30 метри и се спојува со главниот длабински канал на 185 метри.

Со новите откритија биле истражени повеќе од 150 метри нови делови од пештерскиот систем.

Девет часа под вода

Најсложен дел од експедицијата било безбедното враќање на Питала од рекордната длабочина.

„Финалното нуркање со кое се постигна рекордот во пештерата, а траеше девет часа, беше внимателно планирано и организирано“, соопшти клубот.

Во операцијата учествувале 12 безбедносни нуркачи, распоредени на различни длабочини и во различни временски интервали.

На површината биле подготвени медицински и спасувачки тимови.

Во приправност биле и хипербарична комора, хеликоптерската единица на МВР, нуркачи од САЕ „Тигар“ и возило на Итната медицинска помош.

Македонските нуркачи поставиле сопствен подводен хабитат

Македонските нуркачи за првпат самостојно конструирале и поставиле подводна воздушна комора, позната како хабитат.

Таа била поставена на длабочина од осум до девет метри и на околу 130 метри од влезот.

Комората им овозможувала на нуркачите престој за време на долгите декомпресиски процедури.

На крајот, хабитатот бил означен и со македонското знаме.

За дополнителна безбедност биле распоредени повеќе од 30 боци со различни мешавини на гасови на десетина локации во пештерата.

Нуркачите имале и резервни батерии за греење и осветлување.

Според клубот, рекордот во Врело ја поставува пештерата на Матка меѓу најзначајните подводни пештерски системи истражени досега.