Фискалниот совет предупредува за растечките трошоци за пензии и јавниот долг
11/03/2025 21:24
Фискалниот совет на Македонија упати сериозно предупредување дека трошоците за пензии се во пораст и претставуваат сериозна закана за финансиската стабилност на државата. Советот предложи дека овие трошоци треба да се намалат под 30 проценти од вкупниот буџет за да се спречи долгогодишна нестабилност на државната каса.
Глигор Бишев, претседател на Фискалниот совет, истакна дека во текот на првите година и пол од работата на советот, се утврдило дека фискалната стратегија не ја исполнува својата улога како стратешки документ. Според него, стратегијата често се менува, дури и на годишна основа, што го нарушува долгорочното планирање на макроекономските и развојните политики на земјата.
И покрај овие предупредувања, Фискалниот совет ја поддржува одлуката на Владата за јавни инвестиции од 5 проценти од БДП, со нагласување дека ако парите не се искористат, тие не треба да се пренаменуваат за други трошоци. Наместо тоа, треба да останат за инфраструктурни проекти или да се инвестираат во посебен фонд за развојни инвестиции.
Министерката за финансии, пак, се пофали дека економските показатели за минатата година биле подобри од очекуваното. Таа истакна дека буџетскиот дефицит бил намален на 4,4 проценти, наместо прогнозираните 4,9 проценти, а забележано е и намалување на јавниот долг.
Меѓутоа, директорот на Светска банка за Косово и Македонија, Масимилијано Получи, нагласи дека јавниот долг на Македонија значително се зголемил и сега изнесува 62,4 проценти од БДП, што е 14 проценти повеќе во споредба со периодот пред пандемијата. Тоа се должи на постојаните фискални дефицити во изминатите години.
Во контекст на овие состојби, Фискалниот совет предлага воведување нови мерки за контрола на јавните расходи, како и воведување на правило кое ќе го ограничи менувањето на финансиските приоритети пред избори, со цел да се обезбеди долгoročна фискална стабилност.
