Дали ќе има доволно јагнешко за Велигден? Цените достигнуваат до 700 денари, а набавката станува предизвик
12/04/2025 9:57
На само 8 дена пред најголемиот христијански празник – Велигден, сè поголемо внимание привлекува прашањето дали ќе има доволно јагнешко месо во продавниците и по која цена ќе се продава.
Велигден, празникот на Христовото воскресение, традиционално се одбележува со јадење јагнешко месо – симбол на жртвата, како што е опишано во библиските предвелигденски настани. Сепак, оваа година ситуацијата на пазарот создава грижи и неизвесност кај граѓаните.
Овчарите реагираат дека не можат да одвојат половина од јагнињата за извоз, што е услов за добивање на дополнителни државни субвенции. Поради тоа, сè повеќе се зборува за проблемите со извозот на јагнешко во Италија, како и за тоа што и италијаните и македонските потрошувачи ќе плаќаат иста цена – од 600 до 700 денари за килограм.
Но, уште поголем проблем претставува ограничената достапност на јагнешкото месо. Во некои месарници не знаат кога ќе добијат нови количества, додека други најавуваат испораки непосредно пред празникот. Поради тоа, во дел од продавниците веќе се прават списоци со заинтересирани купувачи кои ќе бидат известени кога ќе пристигне свежо месо.
И онлајн набавките не нудат решение – на интернет платформите јагнешко речиси и да нема, а домаќинките на социјалните мрежи веќе предупредуваат дека годинава ќе биде потешко да се најде.
Новинарските наслови само го потврдуваат растечкото незадоволство:
„Јагнешко за Велигден ќе има – за тој што може да си го дозволи“
„Јагнешко за Велигден – ама по 660 денари за килограм“
„Соседите ќе слават Велигден со македонско јагнешко, а за нас глави по 60 до 80 денари“
Интересно е што лани, непосредно пред Велигден, имаше толку многу јагнешко месо што некои продавници користеа маркетинг кампањи за да го продадат – купувачите на четвртина јагне добиваа подарок шише пиво, во ограничени количини.
Од Министерството за економија потсетуваат дека сè уште е на сила одлуката за ограничување на бруто-профитната маржа на 102 основни прехранбени производи, како и Одлуката за утврдување на највисоки цени на осум групи основни намирници. Двете мерки важат до крајот на април.
Дали традицијата ќе се одржи и годинава или ќе се соочиме со нови предизвици во велигденската трпеза – останува да видиме.
