Вонредни локални избори во Р. Србија: Убедлива победа на СНС во Заечар, тесна во Косјериќ
09/06/2025 0:52
Вучиќ: Убедлива победа на СНС во Заечар, тесна во Косјериќ
Претседателот на Србија, Александар Вучиќ, се обрати по повод локалните избори одржани во Заечар и Косјериќ. Тој нагласи дека изборите се спроведени во многу тешки услови, вклучително и, како што рече, „притисоци, прогон и малтретирање на граѓаните“.
„Не е нормално да се гласа во вакви услови. Излеговме на избори за да му се спротивставиме на теророт. Минатиот пат немавме мнозинство во Заечар, но сега, и покрај сите пречки и нарушен изборен молк, постигнавме голема и убедлива победа“, изјави Вучиќ.
Тој додаде дека победата во Заечар е пет и пол пати поизразена отколку онаа во Косјериќ, каде резултатот бил тесен, но и таму победила листата на СНС. Вучиќ покажа копии од сите 29 записници од гласачките места во Косјериќ, потпишани и од политичките противници, нагласувајќи дека нема сомнеж околу легитимноста на резултатите.
„Во Заечар освоивме 48,05% од гласовите, додека втората листа доби 34,74%, а третата 7,72%. Разликата во бројот на гласови е значајна – ние имаме 13.711, а второпласираните 9.812“, посочи Вучиќ, додавајќи дека останува само едно гласачко место што нема да влијае на исходот.
Според него, конечната распределба на мандати најверојатно ќе биде 27 за СНС, 19 за второпласираната листа и 4 за третата. СПС, според моменталните резултати, е многу блиску до изборниот праг, и можно е да остане под него, рече Вучиќ.
Тој додаде дека СНС на овие избори освои повеќе гласови отколку на претходните – над 14.000 во споредба со 11.800, што, според него, е показател за зголемената поддршка. Во Косјериќ СНС доби 3.686 гласови, пред втората листа со 3.635, а Руската партија освои 49 гласа, недоволно за мандат.
Вучиќ забележа дека СПС и партијата на Бранислав Несторовиќ постигнале подобри резултати на национално ниво отколку на овие локални избори.
