Почнува судењето за нападот врз градоначалничката Данела Арсовска
29/07/2025 8:14
Во Основниот кривичен суд во Скопје денеска започнува судскиот процес против лицето обвинето за напад врз градоначалничката на Град Скопје, Данела Арсовска.
Инцидентот се случи на 11 јули на улицата „Севастополска“ во Скопје, додека Арсовска со службени лица вршела теренска проверка по пријава за бесправна градба и нелегални приклучоци.
Детали од обвинението
Според обвинителниот акт, обвинетиот С.Љ. извршил грубо насилство врз градоначалничката, нанесувајќи ѝ телесни повреди и предизвикувајќи чувство на несигурност и страв кај неа и присутните граѓани.
„Додека градоначалничката со овластени службени лица присуствувала на локација по пријава на граѓани за бесправна градба и неовластени приклучоци, обвинетиот пристигнал со електричен тротинет, се приближил заканувачки и физички ја нападнал. Ја удрил по лицето и раката, а потоа ја ритал во пределот на левата потколеница. Дури и по интервенцијата на униформирани полициски службеници, продолжил со вербални навреди и закани,“ соопшти Јавното обвинителство.
Обвинетиот се наоѓа во притвор, а денешното рочиште е почеток на судскиот процес кој треба да ја утврди неговата одговорност за кривичното дело.
Во Основниот кривичен суд во Скопје денеска започнува судскиот процес против лицето обвинето за напад врз градоначалничката на Град Скопје, Данела Арсовска.
