Од денес 18 до 29 август, во Општина Карпош „Карпошово културно лето“
18/08/2025 13:46
Од 18 до 29 август, Општина Карпош ќе биде центар на културата и уметноста преку традиционалната манифестација „Карпошово културно лето“. Во десетина августовски вечери, на повеќе локации низ општината, ќе се одржат концерти, танцувачки настапи, поетски читања, филмски проекции и изложби што ќе ја прикажат креативната енергија и уметничкиот потенцијал на Македонија.
Свеченото отворање е закажано за 18 август во 20:00 часот на платото кај Млечен ресторан, со концерт на легендите на македонската забавна музика. Ќе настапат Зорица Поп Панкова, Драган Мијалковски, Сашо Гигов Гиш, Џон Илија Апелгрен, Тања Тас и младата ѕвезда Ана Петановска, придружени од оркестарот на Радио Бубамара под диригентство на маестро Дамер Имери.
Манифестацијата нуди навистина богата програма:
Фолк вечери во Бардовци (28 август) – концерт на големите имиња на народната музика: Наум Петревски, Ефто Пупиновски, Зуица Лазова, Ленче Кукиќ и други, со оркестарот на Радио Бубамара.
Инструментални концерти – мултиинструменталистот Александар Јовевски со новиот албум „Од колено на колено“, виртуозот на хармоника Мишел Трајковски со својот оркестар, како и ексклузивен настап на Ансамблот на Стевче Стојчевски со проектот „МакЕдинство“.
Танц и фолклор – настапи на клубовите „Денсерс Јунајтед“ и „Еурека“, европски и светски прваци во танци, како и концерт на АКУД „Мирче Ацев“ со хор и играорна група.
Поезија и филм – поетско-музичка вечер „Волкот на љубовта“ со Тихомир Јанчовски, Бранислав Николов и Андријана Јаневска на Летната сцена кај Кеј, изложбата „Капка уметност“ на Елена Галика, како и кино под отворено небо со култниот филм „Пред дождот“ на Милчо Манчевски.
„Карпошово културно лето“ е вистинска прослава на македонската уметност – од музика и танц до литература и филм. Со внимателно избраната програма, општината им нуди на жителите и гостите незаборавни летни вечери, исполнети со врвна културна содржина и исклучиво домашен потенцијал.
Оваа година Карпош уште еднаш потврдува дека е општина со силен културен пулс, место каде што традицијата и современото творештво се спојуваат за да создадат уникатно уметничко искуство.
