Меџити: Лобисти на српскиот свет се семејството на Ахмети – сега е јасно зошто Османи 11 пати бил во Белград, а ниеднаш во Приштина
30/09/2025 12:10
Изет Меџити, лидер на Демократското движење и кандидат за градоначалник на Чаир од Коалицијата Вреди, изрази сериозни обвинувања кон лидерот на ДУИ, Али Ахмети, поврзувајќи го неговото семејство со лобисти на српскиот свет. Според Меџити, поврзаноста со српскиот свет не е случајна, туку дел од стратегија, и тоа го потврдуваат неодамнешните настани.
„Тука ја гледам и нервозата на Ахмети, бидејќи на крај испадна дека поврзаноста и лобисти на српскиот свет не е никој друг, туку неговиот син и неговото семејство“, изјави Меџити. Тој посочи дека Дака Давидовиќ, кој е дел од српскиот свет, ја избрал Тетово за своето делување, каде што раководи ДУИ. Дополнително, Меџити истакна дека казината поврзани со српскиот свет дошле преку Артан Груби, додека брзите кредити од Радојчиќ, кој бил избркан од Косово, биле вдомени од министерот за финансии од ДУИ.
„Од ова е јасно зошто Бујар Османи, како министер за надворешни работи, имаше просрпски ставови за Митровица во Косово, зошто 11 пати отиде во Белград и ниту еднаш во Приштина“, нагласи Меџити.
Тој додаде дека нервозата на Ахмети и неговото семејство се одразува во нивните реакции, посочувајќи дека тие се плашат од одговорот на народот. „Повторно 107.000 гласачи Албанци, кои не гласале за Ахмети, се обвинуваат и се опишуваат со грди зборови, но тие ќе знаат да одговорат на 19 октомври“, изјави Меџити.
Меџити истакна дека Ахмети не е првпат да ги напаѓа своите противници, но дека ова покажува за нервозата во редовите на ДУИ.
„Ги плаши одговорот од народот. Не е првпат. Ахмети ги пцуеше и во минатото, ги обвини тешко и тетовци. Ова не му е прв ваков испад, но тоа кажува за нервозата во нивните редови“, изјави Меџити.
Меџити повика на одговорност и транспарентност во политичкото делување, нагласувајќи дека граѓаните заслужуваат да бидат информирани за вистинските врски и влијанија кои ги имаат нивните лидери.
