Москва: Американскиот мировен план за Украина бара сериозна анализа
26/11/2025 13:39
Помошникот на рускиот претседател, Јуриј Ушаков, денеска изјави дека најновиот мировен план на САД за Украина сè уште не бил тема на официјални разговори меѓу Москва и Вашингтон и дека предлогот бара „детална и сериозна анализа“ од руската страна.
Ушаков потврди дека руските разузнавачки претставници престојуваат во Абу Даби, каде што разговарале со украински официјални лица за „многу чувствителни прашања“, меѓу кои и размена на заробеници. Според американски функционер, присутен таму бил и секретарот на американската армија, Ден Дрискол, со кој руската делегација имала кратка, ненадејна средба.
„Не, за мировниот план не се дискутираше во Абу Даби. Овој мировен план сè уште не е детално дискутиран со никого“, изјави Ушаков за руските државни медиуми. Тој додаде дека документот бил доставен до Москва, но дека предлозите бараат „навистина сериозна анализа“ и експертска дискусија.
Ушаков потврди и дека специјалниот претставник на американскиот претседател, Стив Виткоф, ќе пристигне во Москва следната недела.
Паралелно со тоа, руското Министерство за надворешни работи упати критики кон европските политичари и медиуми, обвинувајќи ги дека се обидуваат да го саботираат американскиот напор за постигнување мировен договор.
Портпаролката Марија Захарова за Радио Спутник изјави дека европските актери водат „информативни напади“ со цел да се „наруши можноста за политичко и дипломатско решавање“ на конфликтот во Украина.
