ЦУК: Критично во Кичево со 125 поплавени објекти, состојбата се следи низ целата држава

Центарот за управување со кризи (ЦУК) објави вонредна информација за состојбата со обилните врнежи на територијата на државата, заклучно со 18:30 часот. Во повеќе региони состојбата е стабилизирана, но Кичево и делови од Пелагонија и понатаму остануваат најпогодени.

Источен регион – Штип

Во моментов нема позначителни врнежи, а водостоите на реките се во опаѓање. Активностите за уредување на коритото на Оризарска Река во Чешиново – Облешево ќе продолжат во понеделник. Поради претходните врнежи има зачестени одрони и свлечишта, особено на патниот правец Истибања – Делчево и кон граничниот премин. Екипи на Македонија Пат и СВР Штип постојано интервенираат за одржување на проодноста.

Скопски регион

Нема нарушување на редовната состојба поврзано со обилните врнежи од дожд.

Југозападен регион – Охрид и Струга

Во Охрид, Кризниот штаб е постојано на терен. Регистрирано е излевање на реката Сушица кај улицата Прилеп, каде се интервенира со багери и се поставуваат заштитни насипи. Во селата Орман и Дебелополе, реката Далјан е со максимален водостој, но без излевање.

Во Струга пријавени се поплавени дворови и куќи во четвртиот реон на Мислешевски пат, како и во селата Мислешево и Калишта. ТППЕ Струга интервенира со пумпи, а состојбата е пријавена до Општина Струга и ДЗС.

Дебар

Реката Радика има зголемено, но стабилно ниво, без опасност од излевање. Сите патни правци се проодни, а забележаните помали одрони редовно се расчистуваат.

Кичево

Во Кичево состојбата останува најкритична. Водостоите на реките Зајашка и Треска се зголемени, но под нивото на излевање. Кај улицата Прилепска се евидентирани 125 поплавени објекти, а околу 150 лица се евакуирани и сместени во спортската сала „Христо Узунов“.

Екипи на ЈП „Комуналец“, ДЗС и приватни фирми работат на изградба на насипи и чистење на речното корито. За евакуираните граѓани е обезбедена храна, медицинска грижа, облека и основни услови за престој.

Битолско – Пелагониски регион

Во овој регион се регистрирани бројни последици од поројните врнежи. Поради оштетување на мост на Боишка Река, затворен е локалниот пат кон село Мренога. Повеќе села имаат поплавени земјоделски површини, меѓу кои Кравари, Жабени и Породин. Излевање е забележано и кај Елешка Река, но водата попладне се вратила во коритото.

Во Ресен поплавени се земјоделски површини, дворови, куќи и магацини за складирање јаболка. Ангажирани се сите расположливи машини и пумпи за санација на состојбата.

Југоисточен и Североисточен регион

Во Струмица и Куманово нема пријави за штети, реките се во коритата, а патиштата се проодни.

Полошки регион – Тетово

Нема пријави за материјални штети. Врнежите од снег се со слаб интензитет. Пријавени се локални проблеми со електричната енергија во делови од Гостивар, каде интервенираат екипи на ЕВН. Воведена е забрана за движење на тешки товарни возила на патниот правец Мавровска раскрсница – Маврово – Дебар.

ЦУК апелира граѓаните да бидат внимателни и да ги следат официјалните соопштенија, особено во критичните региони.