Орбан предупредува: ЕПП сака да го укине ветото и да ја претвори ЕУ во воен сојуз
03/02/2026 13:42
Унгарскиот премиер Виктор Орбан изјави дека Европската народна партија (ЕПП) усвоила стратегија со која се предвидува укинување на правото на вето на земјите-членки на Европската Унија и трансформација на ЕУ во воен сојуз.
Во објава на Фејсбук, Орбан наведе дека оваа стратегија е усвоена од ЕПП, чија членка е и унгарската опозициска партија Тиса.
„Ова е стратегијата што ја усвои ЕПП. Ова е нивната цел. Секој што е член на ЕПП се согласува со оваа програма. Тиса не може да се откаже од неа, дури и ако сака“, напиша Орбан.
Во видео порака, унгарскиот премиер изјави дека раководството на ЕПП одржало состанок во Загреб минатата недела, на кој биле договорени две клучни насоки.
„Првата е одземање на правото на вето на земјите-членки во Брисел. Втората е трансформација на Европската Унија во воен сојуз“, изјави Орбан, додавајќи дека ЕПП има право да носи сопствени политички одлуки.
Сепак, според него, проблемот за Унгарија е што најголемата опозициска партија е дел од ова политичко семејство, што, како што тврди, ќе има директни последици врз унгарската внатрешна политика.
„Без оглед на тоа што ќе тврди Тиса, факт е дека тие поддржуваат укинување на правото на вето. Тие веќе го пронајдоа и својот кандидат за министер за надворешни работи“, напиша Орбан.
Изјавите на унгарскиот премиер се вклопуваат во неговата долгогодишна критика кон Брисел и кон обидите за поголема централизација на одлуките во рамки на Европската Унија.
Унгарскиот премиер Виктор Орбан изјави дека Европската народна партија (ЕПП) усвоила стратегија со која се предвидува укинување на правото на вето на земјите-членки на Европската Унија и трансформација на ЕУ во воен сојуз.
