САД тестираа интерконтинентална ракета „Минутмен 3“
04/03/2026 16:06
Соединетите Американски Држави спроведоа планирано тест-лансирање на интерконтиненталната балистичка ракета „Минутмен 3“, соопшти Глобалната команда за удар на воздухопловните сили на САД. Од таму нагласија дека тестот не е поврзан со актуелните светски настани.
Лансирањето беше извршено од воздухопловната база „Ванденберг“ во Калифорнија. Ракетата не била вооружена со нуклеарни боеви глави и носела две тест возила за враќање во атмосферата.
Според потполковник Кери Реј, командант на 576-та тест ескадрила, тестирањето им овозможува на американските сили да ги анализираат перформансите на поединечните компоненти на ракетниот систем и да испитаат различни сценарија за негова употреба.
„Континуираното тестирање на различни профили на мисии ни овозможува да ги подобриме перформансите на целата флота на интерконтинентални балистички ракети и да обезбедиме максимална подготвеност на копнената компонента на американската нуклеарна тријада“, изјави Реј.
За време на тестот, двете возила за враќање во атмосферата патувале илјадници километри и стигнале до однапред одредена цел на атолот Кваџалеин на Маршалските Острови.
Добиените податоци од тестирањето ќе се користат за проценка на точноста и сигурноста на системот „Минутмен 3“, како и за понатамошен развој и модернизација на стратешките сили на САД.
