Кина им наложи на рафинериите да го запрат извозот на дизел и бензин поради кризата на Блискиот Исток

05/03/2026 16:24

Кина им наложила на своите најголеми нафтени рафинерии привремено да го суспендираат извозот на дизел и бензин поради ризик од глобален недостиг на енергенси поврзан со конфликтот на Блискиот Исток, објави Bloomberg News повикувајќи се на неименувани извори.

Според извештајот, претставници на National Development and Reform Commission – главниот економски планер на земјата – одржале состанок со претставници на рафинериите и усно побарале привремено да се прекинат испораките на рафинирани нафтени деривати.

Рафинериите биле повикани да престанат со потпишување нови договори за извоз, како и да преговараат за откажување на веќе договорени пратки.

Кина е нето-увозник на нафта и една од азиските економии кои во голема мера зависат од Ормутски Теснец – клучна поморска рута за транспорт на енергенси. Сообраќајот низ теснецот во моментов е блокиран поради ескалацијата на конфликтот.

Според аналитичката компанија Kpler, дури 57 проценти од директните поморски увози на сурова нафта во Кина во 2025 година потекнувале од Блискиот Исток.

Портпарол на Министерство за надворешни работи на Кина изјави дека нема информации за ваква одлука кога бил прашан на редовна прес-конференција.

Меѓу најголемите кинески компании кои редовно добиваат квоти за извоз на горива се PetroChina, Sinopec, CNOOC, Sinochem Group и приватната рафинерија Zhejiang Petrochemical.

Овие компании засега не одговориле на барањата за коментар, пренесува AFP.