Хакерски напад на Booking, ризик од измами на корисниците

Платформата за резервации на сместување Booking.com потврди дека била цел на сајбернапад, при што неовластени лица добиле пристап до дел од податоците поврзани со резервациите на корисниците. Од компанијата соопштија дека веднаш презеле мерки за ограничување на инцидентот и за заштита на системите.

Според досегашните информации, компромитираните податоци може да вклучуваат:

• имиња на корисници

• адреси на електронска пошта

• телефонски броеви

• информации за резервации

Од Booking.com нагласуваат дека нема докази дека се компромитирани финансиските податоци на корисниците, како што се податоците од банкарски картички.

Компанијата веќе испратила известувања до погодените корисници и ја ажурирала PIN-заштитата за резервации. Воедно, од платформата предупредуваат дека украдените податоци може да се искористат за измами и лажно претставување.

Апел до корисниците:
Од Booking.com апелираат до сите корисници да бидат внимателни и да не споделуваат чувствителни информации. Компанијата потсетува дека:

• никогаш не бара податоци од банкарски картички преку е-пошта, телефон или апликации за пораки

• никогаш не бара дополнителни плаќања надвор од официјалните канали

Совети за заштита:
Корисниците се советуваат:

• да не отвораат сомнителни линкови во е-пораки или пораки

• да пријавуваат можни обиди за фишинг на официјалниот канал на Booking.com

• да ги проверуваат своите резервации директно преку официјалната апликација или веб-страница

Ова не е прв безбедносен инцидент поврзан со платформата, која во последните години се соочува со зголемен број сајбер напади и измами насочени кон корисниците.

Share on Facebook

Tweet

Follow us

Save