Обвинителството: Мицкоски првпат му се јавил на Савески, не се разговарало за детали од предметот

Јавното обвинителство соопшти дека државниот јавен обвинител не може да спречи некого телефонски да го контактира.

Оттаму велат дека премиерот Христијан Мицкоски вчера за првпат телефонски му се јавил на државниот јавен обвинител Ненад Савески.

Според Обвинителството, во разговорот во ниту еден момент не станало збор за детали од конкретен предмет. Тоа, како што наведуваат, важи и за случајот за кој во јавноста има најголем интерес.

Од Јавното обвинителство посочуваат дека на прашањето на премиерот му било кажано истото што вчера веќе било јавно објавено во медиумите.

Тоа значи дека предметот не бил рефериран во републичкото обвинителство. Воедно, државниот јавен обвинител за одлуката дознал дури по нејзиното донесување.

Одлуката ја носи обвинителот од ОЈО ГОКК

Од Обвинителството дополнуваат дека предметниот јавен обвинител од ОЈО ГОКК одлучува самостојно.

Во соопштението се повикуваат и на член 3 од Законот за јавното обвинителство. Според него, обвинителството е организирано врз принципите на хиерархија и субординација.

Сепак, како што нагласуваат, тие принципи не смеат да ја загрозат самостојноста и одговорноста на секој јавен обвинител во вршењето на функцијата.

Мицкоски телефонски побарал објаснување од Савески за укинувањето на предметите за набавка на мазут

Апел за почитување на самостојноста

Од Јавното обвинителство порачуваат дека уставно загарантираната самостојност на институцијата мора да ја почитуваат сите.

Со ова, Обвинителството се обиде да даде појаснување по реакциите во јавноста околу контактот меѓу премиерот и државниот јавен обвинител.

Share on Facebook

Tweet

Follow us

Save