Советот на јавни обвинители бара објаснување: Како тоа Савески прима повици од Мицкоски?

13/05/2026 17:38

Советот на јавни обвинители ќе побара официјално објаснување од државниот јавен обвинител Ненад Савески, откако премиерот Христијан Мицкоски јавно откри дека разговарал со него за конкретен предмет.

Станува збор за истрагата за набавката на мазут за ТЕЦ „Неготино“. Таа постапка претходно беше запрена од Основното јавно обвинителство за гонење организиран криминал и корупција.

Претседателот на Советот на јавни обвинители, Башким Бесими, изјави дека за ваквиот контакт дознале од медиумите. Тој најави дека најпрво ќе разговара со Савески, а потоа ќе се одлучува дали ќе биде свикана вонредна седница.

Советот бара разјаснување за контактот

Бесими посочил дека Советот нема надлежност директно да се меша во конкретни предмети. Сепак, нагласил дека има обврска да следи дали постојат евентуални влијанија врз обвинителите.

Според него, неопходно е да се слушне државниот обвинител за да се разјаснат околностите под кои се водел разговорот.

Засега, како што се наведува, нема официјален одговор од Државното јавно обвинителство за природата на телефонскиот разговор меѓу премиерот и Савески.

Мицкоски реагираше на одлуката за ТЕЦ „Неготино“

Премиерот Христијан Мицкоски претходно изрази незадоволство од одлуката на ОЈО ГОКК, со кое раководи Ислам Абази, да ја запре постапката за ТЕЦ „Неготино“.

Тој изјави дека во разговорот со Савески добил информација оти државниот обвинител воопшто не бил запознаен со таквата одлука.

Мицкоски очекува случајот повторно да биде разгледан по жалбата што ја поднесе ЕСМ.

Во изминатиот период, премиерот неколкупати јавно побара од Савески да се активираат предмети кои, според него, долго време стоеле без разрешница. Меѓу нив ги спомена и случаите за бонусите во СЈО, како и доказите за „27 април“.

Критики за мешање во обвинителството

Јавните настапи и директната комуникација на премиерот со државниот обвинител предизвикаа реакции во јавноста.

Опозицијата и дел од правните експерти оценија дека ваквиот однос може да се толкува како мешање на извршната власт во работата на обвинителството.

Според нив, на тој начин се создава впечаток на политички притисок врз институција која треба да работи самостојно и независно.

Савески претходно тврдеше дека нема да се меша во предмети

Дополнителна тежина на целиот случај дава и претходната изјава на Ненад Савески, дадена по неговиот избор на функцијата.

Тогаш тој јавно кажа дека нема намера да се меша во работата на обвинителите по конкретни предмети. Посочи дека секој обвинител треба да постапува самостојно и без притисоци.

На прашањето дали би разговарал со премиерот за конкретни случаи, неговиот одговор тогаш бил краток: „Секако не“.