Савески под удар, Абази на нишан: власта и опозицијата отворија нов фронт во обвинителството
14/05/2026 16:55
Политичката пресметка околу правосудството добива нова и сè пожестока димензија, откако во само два дена во центарот на јавноста се најдоа државниот јавен обвинител Ненад Савески и шефот на ОЈО ГОКК, Ислам Абази.
Откако премиерот Христијан Мицкоски јавно соопшти дека телефонски разговарал со Савески за предмет што не го води републичкото обвинителство, туку обвинителството за организиран криминал, повторно се отвори прашањето за независноста на обвинителството. СДСМ реагираше со барање Савески да поднесе оставка, обвинувајќи дека премиерот и обвинителот по телефон договараат предмети и тек на истраги.
Од партијата тврдат дека станува збор за јасен пример за партизирано обвинителство. Во нивната реакција се наведува дека наместо независни институции, Македонија добива обвинителство кое работи под политички диктат.
Зошто Мицкоски му ја урива позицијата на Савески?
Во јавноста сè погласно се поставува прашањето зошто самиот премиер со свои изјави создава впечаток дека Савески е обвинител на кого може да му се нарачува што да работи.
Особено поради тоа што Савески од старт беше претставен како решение што треба да донесе нов кредибилитет во системот. Наместо тоа, сега се отвора дилема дали неговата позиција се претвора во политички зависна функција, а не во самостојна обвинителска улога.
Дополнителна тежина на ова му дава и фактот што, според критичарите, Савески досега не остави впечаток на обвинител кој ја брани институционалната дистанца од извршната власт.
Абази станува новата мета
Паралелно со нападите врз Савески, власта отвори и фронт кон Ислам Абази. Повод е затворањето на предметот „Мазут“, тежок 167 милиони евра.
ВМРО-ДПМНЕ и нивни функционери оценуваат дека станува збор за скандалозна одлука. Тврдат дека обвинителството прво барало притвори и говорело за сериозен случај, а една година подоцна оценило дека нема основ за продолжување на постапката.
Во критиките се наведува дека јавноста видела индиции за финансиска и еколошка штета, додека обвинителството не утврдило ништо спорно.
Правосудството повторно во центарот на политичката битка
Целата оваа пресметка доаѓа во чувствителен момент, само неколку недели пред новите оценки од Брисел за реформите во државата. Токму состојбите во судството и обвинителството остануваат меѓу најважните точки за Европската Унија.
Во таква атмосфера, наместо доверба во институциите, јавноста гледа отворена војна меѓу политиката и обвинителството, но и внатрешна пресметка околу тоа кој обвинител кому му е поблизок.
Без вистински реформи, сè останува исто
Од целата оваа состојба станува јасно дека вистински суштински промени во правосудството нема. Наместо департизација, се гледа ново позиционирање на влијанија.
Додека едни се компромитираат, други се таргетираат, а трети се користат за политички наратив, впечатокот е ист: правосудниот систем и натаму останува поле за политички пресметки, наместо гарант на правдата.
Политичката пресметка околу правосудството добива нова и сè пожестока димензија, откако во само два дена во центарот на јавноста се најдоа државниот јавен обвинител Ненад Савески и шефот на ОЈО ГОКК, Ислам Абази.
