Службениот луксуз на Мерко продаден: Ауди А6 отиде во Битола за 22.000 евра
Општина Струга со аукција го продаде озлогласеното возило што со години беше симбол на прекумерниот луксуз на поранешниот градоначалник
Аудито го купи битолчанец
Службеното возило „Ауди А6“ , кое со години го користеше поранешниот градоначалник на Општина Струга, Рамиз Мерко , е продадено на јавна аукција за 1.350.000 денари , односно околу 22.000 евра . Информацијата ја објави телевизијата Алсат , според која новиот сопственик е лице од битолскиот регион .
Средствата одат за намалување на долгот
Од Општина Струга соопштија дека средствата од продажбата ќе бидат насочени кон намалување на јавниот долг на општината.
„За 22.000 евра е намален долгот на Општина Струга. Озлогласеното службено возило, кое беше симбол на прекумерниот луксуз на поранешниот градоначалник, денес беше продадено, со што се намалува јавниот долг на нашата општина“, наведуваат од локалната самоуправа.
Промена на политиката за возниот парк
Од Општина Струга додаваат дека возниот парк треба да располага со возила кои се неопходни за ефикасно и нормално функционирање на општинската администрација. Ваквиот пристап, велат, е насочен кон намалување на трошоците и јавниот долг , со цел рационално управување со буџетските средства.
