Денеска се празнува Свети Сампсон Странопримец, лекарот што им служел на сиромашните и болните

10/07/2026 7:38

Денеска се празнува Свети Сампсон Странопримец, светител познат по милосрдието, лекарската служба и грижата за сиромашните и болните.

Овој светител бил роден од богати и прочуени родители во стариот Рим.

Таму го изучил сето светско знаење на своето време, а особено се посветил на лекарската наука.

Милосрден лекар и бесребреник

Како лекар, Сампсон бил милосрден и бесребрен.

На болните им давал лекови за телото, но и совети за душата.

Ги поучувал да ги извршуваат заповедите на христијанската вера.

Подоцна се преселил во Цариград, каде што живеел во мал дом.

Од таму им помагал на сите на кои им била потребна милостиња, утеха, совет, надеж и лек.

Патријархот слушнал за добродетелите на Сампсон.

Поради неговиот живот исполнет со милосрдие и вера, го ракоположил за свештеник.

Во тоа време се разболел царот Јустинијан Велики.

Според уверувањето на лекарите, болеста била неисцеллива.

Тогаш царот се помолил на Бога со голема усрдност.

Според преданието, Бог му открил во сон дека Сампсон ќе го исцели.

Кога царот дознал за Сампсон, го повикал во дворецот.

Штом старецот ја ставил раката на болното место, царот оздравел.

Јустинијан сакал да го награди со големо богатство.

Но, Сампсон не сакал да прими ништо.

„О цару, имав јас и злато и сребро и други имоти, но сè оставив заради Христа, за да ги стекнам вечните небесни богатства“, рекол тој.

Бидејќи царот настојувал сепак да направи нешто за него, Свети Сампсон побарал да се изгради дом за бедните и беспомошните.

Во тој дом Сампсон им служел на сиромашните како родител на своите деца.

Милоста кон сиромашните и немоќните била негова природна особина.

Свети Сампсон се упокоил мирно на 27 јуни 530 година.

Бил погребан во црквата на светиот маченик Мокиј, негов роднина.

Според преданието, и по неговото упокојување, многупати им се јавувал на оние што го повикувале на помош.