Рекордна казна од 550 милиони евра за „Алиекспрес“ поради опасни и фалсификувани производи

Европската комисија ѝ изрече рекордна казна од 550 милиони евра на трговската платформа „Алиекспрес“.

Причината е непочитување на обврските од европскиот Закон за дигитални услуги.

Според Комисијата, платформата не ги проценила и намалила доволно ризиците од продажбата на нелегални, небезбедни и фалсификувани производи.

Опасните производи останувале достапни со недели

На платформата биле нудени фалсификувана брендирана облека, небезбедни играчки и опасна козметика.

Европската комисија утврдила дека дел од ваквите производи останувале достапни со недели.

Според регулаторот, „Алиекспрес“ не презел доволно ефикасни мерки за нивно откривање, отстранување и спречување на повторното објавување.

Недоволно лица ги проверувале производите

Брисел ја критикуваше компанијата поради недоволниот број лица задолжени за проверка на понудените производи.

Комисијата оценила дека платформата ја преценила ефикасноста на системите за откривање и отстранување нелегални понуди.

Како проблем биле посочени и слабите казни за трговците. Дел од казнетите продавачи продолжувале да нудат забранети производи.

Препораките дополнително ги ширеле нелегалните понуди

Според Европската комисија, системите за препораки и рекламирање придонесувале за ширењето на нелегалните производи.

Не била доволно ефикасна ниту задолжителната постапка за одобрување брендови, воведена за спречување фалсификати.

Трговците можеле лесно да го заобиколат системот и повторно да понудат лажни производи.

„Алиекспрес“ не се согласува со казната

Од компанијата ја оценија казната како непропорционална.

„Алиекспрес“ тврди дека одлуката не ги зема доволно предвид подобрувањата во безбедноста и управувањето со ризиците.

Компанијата соопшти дека внимателно ја разгледува одлуката и сите достапни можности за понатамошно постапување.

Рок до 20 октомври за нови мерки

Европската комисија му наложи на „Алиекспрес“ да преземе дополнителни мерки за усогласување со европските правила.

Платформата има рок до 20 октомври да предложи план за отстранување на утврдените слабости.

Доколку мерките не бидат доволни, компанијата може да се соочи со нови парични казни.

„Алиекспрес“ минатата година имал околу 193 милиони корисници во Европа. Тоа ја прави платформата една од најголемите онлајн продавници на европскиот пазар.